دہلی یونیورسٹی کے سابق پروفیسر سائی بابا کا انتقال، یو اے پی اے کیس میں ملی تھی رہائی
حیدرآباد، 13/اکتوبر (ایس او نیوز /ایجنسی)ماؤنوازوں سے مبینہ تعلقات کے الزامات میں سات ماہ قبل بری ہونے والے دہلی یونیورسٹی کے سابق پروفیسر جی این سائی بابا کا ہفتہ کو دہلی کے ایک سرکاری اسپتال میں انتقال ہو گیا۔ ان کی عمر 54 سال تھی۔ وہ گال بلڈر کے انفکشن میں مبتلا تھے اور دو ہفتے پہلے ان کی سرجری کی گئی تھی، جس کے بعد انہیں کئی پیچیدگیوں کا سامنا کرنا پڑا۔ گزشتہ بیس دن سے نظامس انسٹی ٹیوٹ آف میڈیکل سائنسز (این آئی ایم ایس) میں زیر علاج رہنے والے جی این سائی بابا نے رات 9 بجے اپنی آخری سانس لی۔
مارکسوادی کمیونسٹ پارٹی کے ایم ایل اے سمباشیو راؤ نے سائی بابا کے انتقال پر گہرے صدمے کا اظہار کیا ہے اور کہا ہے کہ یہ سماج کے لیے ایک بڑا نقصان ہے۔ آل انڈیا استوڈنٹس ایسو سی ایشن (آئیسا) نے سائی بابا کے انتقال پر غم کا اظہار کیا ہے اور ان کی بہادری اور انصاف کے تئیں ان کے عزم کی تعریف کی ہے۔
واضح ہو کہ سائی بابا نے اس سال اگست میں الزام لگایا تھا کہ ان کے جسم کے بائیں حصے کے فالج مار جانے کے باوجود اتھاریٹی 9 مہینے تک انہیں اسپتال نہیں لے گیا اور انہیں ناگپور سنٹرل جیل میں صرف درد کم کرنے کی دوائیں دی گئیں جہاں وہ 2014 سے اس معاملے میں گرفتار کیے جانے کے بعد بند تھے۔
انگریزی کے سابق پروفیسر سائی بابا نے دعویٰ کیا تھا کہ ان کی آواز دبانے کے لیے ان کا اغوا کیا گیا ہے اور پولیس نے انہیں گرفتار کیا۔ آندھرا پردیش کے باشندہ سائی بابا نے یہ بھی الزام لگایا تھا کہ حکام نے انہیں وارننگ دی تھی کہ اگر انہوں نے بات کرنا بند نہیں کیا تو انہیں کسی جھوٹے معاملے میں گرفتار کر لیا جائے گا۔
ان کا الزام تھا کہ دہلی سے انہیں اغوا کیا گیا اور انہیں مہاراشٹر پولیس نے گرفتار کیا۔ مہاراشٹر پولیس کے ایک سینئر افسر ایک جانچ افسر کے ساتھ ان کے گھر گئے اور انہیں اور ان کے کنبہ کو دھمکایا اور گرفتار کرتے وقت پولیس نے انہیں وہیل چیئر سے گھسیٹا اور اس کے نتیجہ کے طور پر ان کے ہاتھ میں سنگین چوٹیں آئیں جس کا ان کے جسم پر بُرا اثر پڑا۔
غور طلب ہے کہ بامبے ہائی کورٹ کی ناگپور بنچ نے نکسلیوں سے مبینہ رشتہ کے معاملے میں جی این سائی بابا اور پانچ دیگر کو مارچ میں بری کر دیا تھا اور کہا تھا کہ استغاثہ ان کے خلاف معاملہ ثابت کرنے میں ناکام رہا ہے۔ عدالت نے ان کی عمر قید کی سزا منسوخ کر دی تھی۔ عدالت نے استغاثہ کے ذریعہ الزامات پر غیر قانونی سرگرمیاں (روک تھام) قانون (یو اے پی اے) کی دفعات کے تحت الزام لگانے کے لیے حاصل کی گؑئی منظوری کو غلط قرار دیا تھا۔ بری ہونے کے بعد سائی بابا وہیل چیئر پر بیٹھ کر 10 سال بعد ناگپور کے سنٹرل جیل سے باہر آئے تھے۔