نئی دہلی، 18/نومبر (ایس او نیوز  /ایجنسی) دہلی میں بڑھتی ہوئی فضائی آلودگی کے پیش نظر 17 نومبر سے گریپ کا مرحلہ 4 نافذ کر دیا گیا ہے، جس کے تحت سخت پابندیاں عائد کی گئی ہیں۔ دارالحکومت میں غیر ضروری ٹرکوں کے داخلے پر مکمل پابندی ہوگی، صرف ضروری سامان یا خدمات فراہم کرنے والے اور سی این جی یا الیکٹرک ٹرکوں کو استثنیٰ دیا جائے گا۔ اس کے ساتھ ہی، دسویں اور بارہویں کلاس کے علاوہ دیگر تمام جماعتوں کے لیے اسکول بند رہیں گے تاکہ طلبہ کی صحت کو تحفظ فراہم کیا جا سکے۔

اس کے ساتھ، دہلی سے باہر رجسٹرڈ ہلکی تجارتی گاڑیاں، سی این جی یا BS-VI ڈیزل گاڑیوں کے علاوہ، دہلی میں داخل ہونے کی اجازت نہیں ہوگی، سوائے ضروری سامان لے جانے والی یا ضروری خدمات میں مصروف گاڑیوں کے۔ دہلی میں رجسٹرڈ ڈیزل گاڑیوں، درمیانے اور بھاری سامان کی گاڑیوں کے چلانے پر بھی پابندی ہوگی۔

دہلی کے وزیر اعلیٰ آتشی نے سوشل میڈیا پر کہا، "کل سے GRAP-4 کے نفاذ کے ساتھ، کلاس 10 ویں اور 12 ویں کے علاوہ تمام طلباء کے لیے فزیکل کلاسز روک دی جائیں گی۔ تمام اسکول اگلے احکامات تک آن لائن کلاسز کا انعقاد کریں گے۔"

دہلی کے وزیر ماحولیات گوپال رائے آج18 نومبر کو دوپہر 12 بجے دہلی سکریٹریٹ میں GRAP-4 قواعد کے نفاذ کے سلسلے میں متعلقہ محکموں کے ساتھ میٹنگ کریں گے۔ اس کے ساتھ وہ دوپہر ایک بجے پریس کانفرنس بھی کر سکتے ہیں ۔