نئی دہلی، 13/اپریل (ایس او نیوز /ایجنسی) دہلی ہائی کورٹ نے ٹاٹا سنس پرائیویٹ لمیٹڈ کے نام سے بنائی گئی ایک فرضی ویب سائٹ کو بند کرنے کا حکم دیا ہے، جس کے ذریعے ایک پونزی اسکیم کو فروغ دیا جا رہا تھا۔ www.tatarestart.com کے تحت چلنے والی دھوکہ دہی والی ویب سائٹ پر ٹاٹا سنس نے غیر حقیقی منافع کے وعدوں کے ساتھ سرمایہ کاروں کو لالچ دینے کا الزام لگایا تھا۔

جسٹس سنجیو نرولا نے ویب سائٹ کی پیچھے کی اکائی ٹاٹا ری اسٹارٹ کے خلاف ایک عبوری حکم امتناعی جاری کیا کہ وہ ’ٹاٹا‘ نام یا ٹاٹا سنس کے رجسٹرڈ ناموں سے ملتے جلتے کسی بھی نشان کا استعمال بند کرے۔ عدالت نے ویب سائٹ کو فوری طور پر ہٹانے اور ڈومین نیم رجسٹرار کو ڈومین بلاک یا معطل کرنے کی ہدایت کی ہے۔

عدالت کا یہ فیصلہ ٹاٹا سنس کی جانب سے ٹریڈ مارک کی خلاف ورزی کے ثبوت پیش کرنے کے بعد آیا ہے جس میں ’ٹاٹا‘ کے لوگو کا غیر قانونی طور پر استعمال کا حوالہ دیا گیا تھا جو ممکنہ طور پر صارفین کو الجھن میں مبتلا اور انہیں دھوکہ دے سکتی ہے۔ عدالت نے کہا کہ ڈومین اور مارک ’ٹاٹا ری اسٹارٹ‘ نہ صرف ٹاٹا سنس کے اپنے رجسٹرڈ ڈومین اور ٹریڈ مارکس سے ملتے جلتے ہیں بلکہ ان کے استعمال میں بے ایمانی کے ارادے کو بھی ظاہر کرتے ہیں۔

عدالت نے اپنے فیصلے میں کہا کہ ویب سائٹ پر مدعی کے ٹریڈ مارک کا حقیقت سے مماثل استعمال صارف کی الجھن اور مدعی کے ساتھ تعلق پیدا کرنے کا پابند ہے، کیونکہ مدعا علیہ نمبر 1 نے مدعی کے رجسٹرڈ ٹریڈ مارک کی خلاف ورزی کی ہے۔ عدالت نے مزید کہا ہے کہ حکم امتناعی کے بغیر ٹاٹا سنس کو ناقابل تلافی نقصان پہنچنے کے خدشے سے انکار نہیں کیا جاسکتا۔