نئی دہلی، 7/ستمبر (ایس او نیوز /ایجنسی) دہلی کی جیلوں میں غیر فطری وجوہات کی وجہ سے مرنے والے قیدیوں کے اہل خانہ یا قانونی ورثاء کو  دہلی حکومت نے7.5 لاکھ روپے کا معاوضہ دینے کا فیصلہ کیا ہے۔ دہلی کے وزیر داخلہ کیلاش گہلوت نے   بتایا کہ یہ اقدام جیل کے نظام میں انصاف اور جوابدہی کو یقینی بنانے کے ہمارے عزم کو واضح کرتا ہے۔ جیل میں غیر فطری حالات میں موت کی صورت میں قیدیوں کے لواحقین کو معاوضے کی فراہمی انسانی حقوق کو مضبوط کرنے کی جانب ایک تاریخی قدم ہے۔ انہوں نے بتایا کہ  دہلی کے  وزیر اعلی  اروند کجریوال کی قیادت میں حکومت کو یقین ہے کہ اس قدم سے ہماری جیلوں میں بہتری آئے گی اور  لاپرواہی میں  کمی واقع  ہوگی۔

ذرائع سے ملی اطلاع کے مطابق دہلی حکومت نے اس سلسلے میں ایک تجویز لیفٹیننٹ گورنر وی کے سکسینہ کو ان کی منظوری کے لیے روانہ کی ہے۔ حکومت کی طرف سے واضح کیا گیا ہے کہ  یہ معاوضہ جیل میں قیدیوں کے درمیان لڑائی، جیل کے عملے کی مار پیٹ، تشدد، جیل حکام کی لاپرواہی، یا طبی یا پیرا میڈیکل اہلکاروں کی لاپرواہی کی وجہ سے غیر فطری موت کے معاملات میں دیا جائے گا۔ جب کہ خودکشی کی وجہ سے غیر فطری موت، جیل سے فرار ہونے کی کوشش یا جیل سے باہر قانونی حراست سے یا قدرتی موت، آفات یا آفات کے معاملات میں معاوضہ قابل قبول نہیں ہوگا۔ اس کے علاوہ بیماری سے ہونے والی اموات پر بھی اس کا اطلاق نہیں ہوگا۔