نئی دہلی، 21/نومبر (ایس او نیوز /ایجنسی)دہلی اسمبلی انتخابات کی تیاریوں کے سلسلے میں عام آدمی پارٹی (عآپ) نے اپنے 11 امیدواروں کی پہلی فہرست کا اعلان کر دیا ہے۔ اس فہرست میں خاص طور پر وہ 6 رہنما شامل ہیں جنہوں نے حال ہی میں دیگر جماعتیں چھوڑ کر عآپ میں شمولیت اختیار کی۔ ان میں سے دو رہنما سابقہ بی جے پی ایم ایل اے رہ چکے ہیں۔

رپورٹ کے مطابق چھترپور سے برہم سنگھ تنور کو امیدوار بنایا گیا ہے، جو بی جے پی کے سینئر لیڈر اور تین مرتبہ ایم ایل اے رہ چکے ہیں۔ انہوں نے 31 اکتوبر کو عام آدمی پارٹی جوائن کی تھی۔ اسی طرح، کراڑی سے انیل جھا کو امیدوار نامزد کیا گیا ہے، جو بی جے پی کے سابق ایم ایل اے ہیں اور حالیہ دنوں میں عآپ میں شامل ہوئے۔

دیگر نمایاں امیدواروں میں وشواس نگر سے دیپک سنگھلا، روہتاس نگر سے سریتا سنگھ، لکشمی نگر سے بی بی تیاگی اور بدرپور سے رام سنگھ شامل ہیں۔ اس کے علاوہ سیلم پور، سیماپوری، گھونڈا، کراول نگر اور مٹیالا سے بالترتیب زبیر چودھری، ویر سنگھ دھینگان، گورو شرما، منوج تیاگی اور سومیش شوقین کو میدان میں اتارا گیا ہے۔

عام آدمی پارٹی کے چیف اروند کیجریوال نے ان امیدواروں کو منتخب کرنے کا فیصلہ پارٹی کے اصولوں کے تحت کیا ہے تاکہ دہلی میں مزید مضبوطی کے ساتھ انتخابات کا سامنا کیا جا سکے۔

عآپ کی فہرست میں شامل امیدوار:

1- چھترپور سے برہما سنگھ تنور، 2- کراڑی سے انیل جھا،3- وشواس نگر سے دیپک سنگھلا، 4- روہتاس نگر سے سریتا سنگھ، 5- لکشمی نگر سے بی بی تیاگی، 6- بدرپور سے رام سنگھ، 7- سیلم پور سے زبیر چودھری،  8- سیماپوری سے ویر سنگھ دھینگاں، 9- گھونڈا سے گورو شرما، 10۔کرول نگر سے منوج تیاگی، 11- مٹیالا سے سومیش شوقین