کرناٹک ضمنی انتخابات میں کانگریس کی شاندار جیت، جے ڈی ایس اور بی جے پی کا گڑھ سمجھے جانے والے حلقوں میں بھی کانگریس نے درج کی جیت
بھٹکل 23/نومبر (ایس او نیوز): کرناٹک میں حکمراں کانگریس نے حالیہ ضمنی انتخابات میں تینوں نشستوں، چن پٹن، شیگاوں اور سندور، پر شاندار کامیابی حاصل کی ہے اور اپنی اکثریت کو مزید مضبوط کیا ہے۔
13 نومبر کو منعقد ہونے والے ان انتخابات میں کانگریس اور بی جے پی-جے ڈی ایس اتحاد کے درمیان سیدھا مقابلہ ہوا۔ کانگریس نے چن پٹن کو جے ڈی ایس سے اور شیگاوں کو بی جے پی سے چھین لیا، جبکہ سندور میں اپنی سیٹ کو برقرار رکھا۔ یہ نشستیں اس وقت خالی ہوئیں تھیں جب ان حلقوں کے 2023 کے اسمبلی فاتحین نے لوک سبھا انتخابات میں حصہ لینے کے لیے استعفیٰ دیا تھا۔
چن پٹن میں جے ڈی ایس نے سابق وزیر اعلیٰ ایچ ڈی کمارا سوامی کے بیٹے نکھیل کمارا سوامی کو این ڈی اے امیدوار کے طور پر میدان میں اتارا، لیکن کانگریس کے تجربہ کار رہنما سی پی یوگیشور نے چن پٹن میں جے ڈی ایس سے اُن کی سیٹ کو چھیننے میں کامیابی حاصل کرلی اور جیت گئے۔ شیگاوں میں، سابق وزیر اعلیٰ بسوراج بومئی کے بیٹے بھارت بومئی، کانگریس کے یاسر احمد خان سے شکست کھا گئے۔ اسی طرح سندور میں، کانگریس کی امیدوار ای اناّپورنا، جو سابق ایم ایل اے ای تکارام کی اہلیہ ہیں، نے بی جے پی کے بنگارُو ہنومانتھو کو شکست دی۔
کرناٹک کانگریس کے صدر اور نائب وزیر اعلیٰ ڈی کے شیوکمار نے اس جیت کے بعد بینگلور اخبارنویسوں سےگفتگو کرتے ہوئے اس جیت کو پارٹی کی ترقیاتی پالیسیوں اور وزیر اعلیٰ سدارامیا کی قیادت کا نتیجہ قرار دیا۔ انہوں نے کہا کہ اسمبلی میں کانگریس کی تعداد 136 سے بڑھ کر اب 138 ہوگئی ہے اور یہ نتائج 2028 کے اسمبلی انتخابات کے لیے ایک پیش خیمہ ثابت ہونے والے ہیں۔
شیوکمار نے کہا کہ کانگریس نے عوام کی فلاح کے لیے 56,000 کروڑ روپے مختص کیے ہیں، جس میں ہر حلقے کو 225-250 کروڑ روپے فراہم کیے جائیں گے۔ سندور میں بی جے پی کے 30,000 ووٹوں کی برتری کو کانگریس کے 14,000 ووٹوں کی سبقت میں بدلنا عوامی اعتماد کی عکاسی کرتا ہے۔
انہوں نے اپوزیشن کی تنقید کو مسترد کرتے ہوئے کہا کہ عوام نے غلط پروپیگنڈے اور جذباتی سیاست کو مسترد کر دیا ہے اور ثابت کیا ہے کہ سیاست کو عوام کی زندگیوں اور روزگار پر مرکوز ہونا چاہیے۔
بھٹکل میں کانگریس کارکنوں کا جشن: کرناٹک کے تینوں اسمبلی حلقوں میں ہوئے ضمنی انتخابات میں کانگریس کی شاندار جیت پر بھٹکل شمس الدین سرکل پر کانگریس کے کارکنوں اور حمایتیوں نے جشن مناتے ہوئے پٹاخے پھوڑے۔ اس موقع پر کانگریس کے صدر پرمیشور نائک، جنرل سکریٹری سریش نائک، عبدالمجید اور دیگر ذمہ داران موجود تھے۔ یاد رہے کہ تینوں اسمبلی حلقوں میں انتخابی پرچار کے لئے بھٹکل سے بھی کانگریسی لیڈران شریک ہوئے تھے اور گھر گھر جاکر پرچار کیا تھا۔ بالخصوص شیگاوں میں جسے بی جے پی کا گڑھ سمجھا جاتا تھا، بھٹکل سے عنایت اللہ شاہ بندری شیگاوں پہنچ کر گھر گھر پرچار سمیت انتخابی ریلیوں میں بھی شریک ہوئے تھے اور عوام الناس سے کانگریس کو جیت دلانے کی اپیل کی تھی۔
