مودی سرکاری تقریب کو اپوزیشن پر تنقید کرنے کیلئے استعمال کررہے ہیں: جے رام رمیش
نئی دہلی،15/ستمبر (ایس او نیوز/ایجنسی) کانگریس نے وزیراعظم نریندر مودی پر انڈیا اتحاد کو گھمنڈیا قرار دینے پر سخت تنقید کی اورالزام عائد کیا کہ نریندر مودی اپوزیشن کا ناجائز استعمال کرنے کیلئے حکومتی تقریب کا استعمال کر رہے ہیں۔ اس ضمن میں کانگریس کے جنرل سیکریٹری جے رام رمیش نے اپنے ایکس پوسٹ پرلکھا کہ نریندر مودی نے وہ کرنا شروع کر دیا جو وہ اچھے طریقے سے کر سکتے ہیں ’بے عزتی‘۔ انہوں نے انڈیا اتحاد کو’ گھمنڈیا اتحاد‘ کہتے ہوئے اس کی دوبارہ بے عزتی کی ہے۔ دیکھئے! کون با ت کر رہے ہیں۔ وہ آدمی جو حکومت کی تقریب کے موقع کو اپوزیشن پارٹیوں کی بے عزتی کرنے کیلئے استعمال کر رہا ہے۔ کوئی بھی آسانی سے کہہ سکتا ہے کہ وہ جی اے۔ این ڈی اے، ’گوتم اڈانی کی این ڈی اے‘ اتحاد کی قیادت کر رہے ہیں۔
کانگریس نے اڈانی معاملے پر بی جے پی کو نشانہ بناتے ہوئے وزیراعظم نریندر مودی پر الزام عائد کیا کہ وہ امریکہ کی ریسرچ رپورٹ میں بے ضابطگیاں اوراسٹاک کی قیمتوں میں ہیرا پھیری سامنے آنے کے بعد بھی اڈانی گروپ کے خلاف تفتیش کا آغاز نہیں کر رہے ہیں۔
خیال رہے کہ نریند رمودی نے انڈیا اتحاد کو گھمنڈیا قرار دیا اور الزام عائد کیا ہے کہ وہ سناتن دھرم کومٹانا چاہتا ہے۔ انہوں نے مدھیہ پردیش کے ساگر ضلع میں ۴۹؍ کروڑ کے بینا پیٹروکیمیکل کامپلیکس کی سنگ بنیاد ڈالنے کے بعد خطاب کرتے ہوئے کہا کہ حال ہی میں انڈیا اتحاد کے لیڈران نے ممبئی میں ملاقات کی۔ ان کے پاس نہ تو کوئی پالیسی ہے اور نہ ہی کوئی لیڈر۔ ان کے پاس صرف سناتن دھرم کونشانہ بنانے کا ایجنڈا ہے جسے وہ ختم کرنا چاہتے ہیں۔
خیال رہے کہ مودی کا یہ رد عمل ڈی ایم کے لیڈر ادھے ندھی اسٹالن کے سناتن دھرم کو نشانہ بنانے اور اسے سماجی انصاف کے خلاف قرار دینے کے بعد سامنے آیا ہے۔