چندی گڑھ، 28/ستمبر (ایس او نیوز /ایجنسی) کانگریس نے ہفتے کے روز چندی گڑھ میں ہریانہ اسمبلی انتخابات 2024 کے لیے اپنا انتخابی منشور پیش کیا، جس میں مختلف طبقات کے لیے خصوصی مراعات کا اعلان کیا گیا ہے۔ اس منشور کے تحت 25 لاکھ روپے تک کا مفت علاج فراہم کرنے کا وعدہ کیا گیا ہے اور خواتین کو ہر ماہ 2 ہزار روپے کی مالی امداد دی جائے گی۔ اس کے ساتھ ہی، ستلج-یمنا لنک نہر سے پانی کی دستیابی کو یقینی بنانے کا عہد بھی شامل کیا گیا ہے۔

خیال رہے کہ یہ منشور کانگریس کے قومی صدر ملکارجن کھڑگے کی قیادت میں تیار کیا گیا اور اسے ’سات وعدے-پکے ارادے‘ کے نام سے جاری کیا گیا ہے۔ منشور میں کہا گیا ہے کہ کانگریس نے سابقہ حکومت میں کیے گئے وعدوں کو پورا کیا اور اس مرتبہ بھی عوام کی فلاح و بہبود کے لیے کام کیا جائے گا۔

کانگریس نے اپنے منشور میں ہریانہ کے لوگوں کو معیاری تعلیم، نوجوانوں کو روزگار، اور بہتر صحت کی سہولیات دینے کے وعدے کیے ہیں۔ اس میں کسان کمیشن کا قیام، کم از کم امدادی قیمت (ایم ایس پی) کی گارنٹی، اور محروم طبقات کو 100 مربع گز زمین دینے کا وعدہ شامل ہے۔

منشور کے چند اہم نکات یہ ہیں:

• - سب کے لیے معیاری تعلیم کی فراہمی
• - نوجوانوں کے لیے روزگار کے مواقع
• - 25 لاکھ روپے تک مفت علاج کی سہولت
• - خواتین کو ہر ماہ 2 ہزار روپے مالی امداد
• - کسان کمیشن کا قیام اور ایم ایس پی کی گارنٹی
• - محروم طبقات کو 100 مربع گز زمین
• - اقلیتی کمیشن کا قیام
• - ہریانہ میں کھیلوں کی ترقی کے لیے مضبوط پالیسی کا نفاذ

کانگریس کے سینئر رہنما اشوک گہلوت نے منشور جاری کرتے ہوئے کہا کہ کانگریس کو یقین ہے کہ ان انتخابات میں کامیاب ہوگی اور عوام کے ساتھ کیے گئے تمام وعدے پورے کیے جائیں گے۔

انہوں نے کہا، ’’ہم نے ابھی ابھی منشور جاری کیا ہے اور ہمیں پورا اعتماد ہے کہ کانگریس حکومت بنائے گی۔ اس منشور کا باقاعدگی سے جائزہ لیا جائے گا اور تمام وعدوں کو پورا کرنے کی ہر ممکن کوشش کی جائے گی۔‘‘