نئی دہلی، 28/اکتوبر (ایس او نیوز /ایجنسی) ہندوستان میں طویل عرصے سے التوا میں پڑی مردم شماری کے دوبارہ شروع ہونے کی قیاس آرائیاں زور پکڑ رہی ہیں۔ خبروں کے مطابق، امکان ظاہر کیا جا رہا ہے کہ 2025 میں مردم شماری کا آغاز ہو سکتا ہے، تاہم سرکاری سطح پر اس بارے میں کوئی بیان نہیں دیا گیا۔ آخری مردم شماری 2011 میں ہوئی تھی، لیکن اس کے بعد سے مرکزی حکومت متعدد وجوہات کے باعث نئی مردم شماری کروانے میں ناکام رہی ہے۔ موجودہ مردم شماری مکمل ہونے کے بعد امکان ہے کہ لوک سبھا سیٹوں کی حد بندی پر بھی غور کیا جائے۔

انڈیا ٹوڈے کی رپورٹ میں ذرائع کے حوالے سے بتایا گیا ہے کہ ملک کی آبادی کا سرکاری سروے 2025 میں شروع ہو سکتا ہے جو سال 2026 تک جاری رہے گا۔ رپورٹ کے مطابق مردم شماری کے بعد لوک سبھا سیٹوں کی حد بندی شروع ہوگی۔ یہ عمل 2028 تک چل سکتا ہے۔ کچھ وقت پہلے یہ خبر آئی تھی کہ حکومت کی طرف سے اس سلسلے میں تیاریاں کی جا رہی ہیں۔

نیوز 18 کی خبر میں ذرائع کا حوالہ دیتے ہوئے بتایا گیا ہے کہ مردم شماری کی رپورٹ 2026 میں دستیاب ہوگی۔ مردم شماری کا چکر 2025 سے 2035 اور 2035 سے 2045 ہوگا۔ واضح ہو کہ اپوزیشن پارٹیاں لگاتار ذات پر مبنی مردم شماری کا مطالبہ کر رہی ہیں۔ اب دیکھنا یہ ہے کہ مرکزی حکومت اس معاملے پر کیا قدم اٹھاتی ہے۔

قابل ذکر ہے کہ ہندوستان کے رجسٹرار جنرل اور مردم شماری کمشنر کے طور پر کام کر رہے مرتیونجے کمار نارائن کے سنٹرل ڈیپوٹیشن کو اگست 2026 تک بڑھا دیا گیا ہے۔ اس سے ان کے طویل عرصے سے زیر التوا دس سالہ مردم شماری کی قواعد کو پورا کرنے کے لیے ٹیم کی قیادت کرنے کی راہ ہموار ہو جائے گی۔ وہ 1995 بیچ کے اتر پردیش کیڈر کے آئی اے ایس افسر ہیں۔ مرتیونجے کمار کو 2020 میں مرکزی وزارت داخلہ کے ماتحت اہم عہدہ رجسٹرار جنرل اور مردم شماری کمشنر کے طور پر تقرر کیا گیا تھا۔