لالو پرساد پر30برس پرانے معاملے میں کیس درج
پٹنہ، 8/جولائی (ایس او نیوز /ایجنسی) پہلے سے ہی کئی مقدمات کا سامنا کررہےآر جے ڈی کے صدر اور سابق وزیراعلیٰ لالو پرساد یادو کے خلاف تقریباً30برس پرانا قتل کیس عدالت پہنچ گیاہے۔ لالو پرساد کے خلاف مظفر پور کی عدالت میں مقدمہ درج کرایاگیا ہے۔
ان پر گاندھی میدان میں اشتعال انگیز تقریر کرنے کا الزام ہے۔ پارو تھانہ حلقے کے استی گاؤں کے رہنے والے راجیو رنجن عرف ٹن ٹن سنگھ نے لالو پرساد کے خلاف یہ شکایت درج کرائی ہے۔ شکایت کنندہ کا الزام ہے کہ 27 جون1994کو لالو پرساد نے پٹنہ کےگاندھی میدان میں مخصوص ذات کونشانہ بناتے ہوئے تقریر کی تھی جس کی وجہ سے کارکنان مشتعل ہو گئے اور انہوں نے اس کے والد کا قتل کر دیا۔ 1994میں بہار میں آر جے ڈی کی حکومت تھی اور لالو پرساد وزیر اعلیٰ تھے۔ راجیو رنجن کاالزام ہے کہ اس کے والد کو اغوا کرلیاگیااور قتل کے بعد لاش کو درخت پر لٹکا دیا گیا۔ راجیو رنجن کا الزام ہے کہ ان کے والد کو ذات پرمبنی تشدد کے جنون میں مارا گیا جس کیلئے لالو ذمہ دار ہیں۔