بھٹکل 23 جون (ایس او نیوز)  بھٹکل کے معروف بزنس مین اور رِبکو کے مالک  جناب عبدالرحمن  شاہ بندری عرف  سائب صاحب  کی رہائش گاہ پر  چوری کی  واردات پیش آئی ہے جس میں چوروں نے اس بات کی تصدیق کرنے کے بعد کہ گھر پر کوئی موجود نہیں ہے، گھر کا تالہ توڑ کر اندر داخل ہوئے ہیں اورلاکھوں روپیہ   نقد سمیت سونے کے زیورات لے کر فرار ہوگئے ہیں۔

   سائب  صاحب جن کا کاروبار مختلف شہروں میں پھیلا ہوا ہے، اکثر  کام کے سلسلے میں باہر  رہتے ہیں ،  اس بار وہ 21 جون کو  کام کے سلسلے میں بنگلور گئے ہیں ۔ آج صبح جب ان کا ڈرائیور مکان پر پہنچا تو چوری کا معاملہ سامنے آیا۔

 اطلاع  ملتے ہی  مضافاتی پولس تھانہ  کے   سرکل پولس انسپکٹر چندن گوپال،  پی ایس آئی شریدھر نائک سمیت دیگر عملہ   جائے وقوع پر پہنچ گیا اور تفصیلات  حاصل کرتے ہوئے جانچ شروع کی۔

 وینکٹاپور علاقہ میں واقع   اس مکان  کے اطراف لوگوں کی چہل پہل زیادہ نہیں رہتی، اور اتنی خوبصورت عمارت یا اطراف  میں سی سی ٹی وی کیمرے  نہیں  ہیں۔ پورے کمپاونڈ کی دیوار پر ٹوٹے ہوئے گلاس لگے ہیں جس کو پھاند کر کمپاونڈ کے اندر داخل ہونا آسان نہیں ہے، مگر  گھروالوں نے بتایا کہ  ایک ہفتہ قبل داخلی گیٹ کو ایک   ٹِپر لاری کی ٹکر سے   نقصان  پہنچا تھا جس  کی وجہ سے  گیٹ اوپن تھی، پولس کو شک ہے کہ ان تمام باتوں کی جانکاری لے کر  ہی چوروں نے یہ واردات انجام دی ہے ۔ پولس نے بتایا کہ چور پہلے مکان کے دروازے  کے ہینڈل اور لاک  کو توڑ کر اندر داخل ہوئے ہیں اور اندرونی دروازوں کو بھی  طاقت کے زور پر توڑا گیا  ہے اس طرح  الماریوں میں موجود قریب سات لاکھ  انڈین روپیہ،  1800    ریال، 3300دینار،4409ڈالر اور قریب 110 گرام سونے کے زیورات اور دو واچ  لے  اُڑے ہیں۔

مضافاتی پولس تھانہ میں چوری کا معاملہ درج کرنے کے ساتھ ہی  پولس نے کاروار سے  ڈاگ اسکواڈ اور فنگر پرنٹس کے  ماہرین کی  ٹیم  کی مدد  سے جانچ شروع کردی ہے۔