دبئی 24 ستمبر (ایس او نیوز): بھٹکل پریمئیر لیگ (بی پی ایل) کرکٹ کا گیارہواں ٹورنامنٹ 5 جنوری 2025 سے شروع ہونے جا رہا ہے۔ اس ٹورنامنٹ میں شرکت کے لیے ٹیموں کا رجسٹریشن یکم نومبر سے جبکہ کھلاڑیوں کا رجسٹریشن 10 نومبر سے شروع ہوگا۔ کھلاڑیوں کی بولی کا عمل 8 دسمبر کو ہوگا۔ یہ تمام تفصیلات بی پی ایل کمشنر طحہٰ معلم نے فراہم کیں۔ انہوں نے بتایا کہ اس سال آٹھ ٹیمیں حصہ لیں گی، اور پانچ ہفتوں کے دوران 15 میچس کھیلے جائیں گے۔

بھٹکل کے زیادہ تر نوجوان گریجویٹ ہوتے ہی روزگار کے حصول کے لیے گلف کا رُخ کرتے ہیں، جس کی وجہ سے انہیں کھیل کود کا زیادہ موقع نہیں ملتا۔ دبئی اور متحدہ عرب امارات کی مختلف کمپنیوں میں ملازمت کرنے والے نوجوانوں کو صرف اتوار کو چھٹی ملتی ہے۔ اسی صورتحال کے پیش نظر، بی پی ایل کمیٹی ہر سال اس ٹورنامنٹ کا انعقاد کرتی ہے تاکہ نوجوانوں کو ایک دوسرے کے قریب لانے، ان کے درمیان تال میل قائم رکھنے، اور کھیل کے ذریعے بھائی چارگی کو فروغ دینے کے ساتھ ساتھ بھٹکل اور اطراف کے لوگوں کو تفریح فراہم کی جا سکے۔

5 جنوری 2025 کو شروع ہونے والے اس ٹورنامنٹ کے اعلان کے ساتھ ہی دبئی میں کرکٹ کا جنون عروج پر پہنچنے کا امکان ہے۔ اس ایڈیشن میں 15 میچس ہوں گے جو پانچ اتواروں کو کھیلے جائیں گے، جبکہ فائنل مقابلہ 2 فروری 2025 کو ہوگا۔

آٹھ ٹیمیں جے ایم آر کرکٹ گراؤنڈ، زیدروڈ، شارجہ میں مقابلہ کریں گی، جبکہ ٹورنامنٹ کا مرکزی اسپانسر "جان اینڈ بروس" ہوگا۔

اہم تاریخیں اور رجسٹریشن کی تفصیلات:
ٹیم رجسٹریشن: 1 نومبر سے 10 نومبر 2024 تک جاری رہے گا۔ پچھلے ایڈیشن کی چار سیمی فائنلسٹ ٹیموں کو اپنی جگہ برقرار رکھنے کا اختیار ہوگا، جبکہ باقی چار ٹیمیں نئی ہوں گی، جو بی پی ایل کمیٹی کی منظوری سے مشروط ہوں گی۔

کھلاڑیوں کا رجسٹریشن: اماراتی رہائشی ویزا رکھنے والے کھلاڑی 10 نومبر سے 15 نومبر 2024 تک اپنے نام کا رجسٹریشن کرا سکتے ہیں۔

کھلاڑیوں کی نیلامی: کھلاڑیوں کی نیلامی 8 دسمبر 2024 کو دبئی میں ہوگی، جہاں ٹورنامنٹ میں حصہ لینے والی رجسٹرڈ ٹیمیں کھلاڑیوں کی بولی لگائیں گی۔

ٹورنامنٹ کا فارمیٹ اور شیڈول:
ہر اتوار کو دو میچس ہوں گے: پہلا میچ صبح 10:30 بجے اور دوسرا میچ دوپہر 2:30 بجے کھیلا جائے گا۔ دو سیمی فائنل چوتھے ہفتے میں ہوں گے جبکہ فائنل پانچویں ہفتے میں ہوگا۔

ٹیموں کو دو گروپس میں تقسیم کیا جائے گا، ہر گروپ میں چار ٹیمیں ہوں گی، اور ہر ٹیم اپنے گروپ میں تین میچز کھیلے گی۔ گروپ اسٹیج کے بعد ہر گروپ کی سرفہرست دو ٹیمیں سیمی فائنل کے لیے کوالیفائی کریں گی۔

کھلاڑیوں کی اہلیت:
آئیکون کھلاڑیوں کے پاس یو اے ای کا رہائشی ویزا ہونا لازمی ہے۔
مہمان کھلاڑی وزٹ یا رہائشی ویزا کے ساتھ شرکت کر سکتے ہیں۔

بی پی ایل کے نئے عہدیداران کا انتخاب:
ٹورنامنٹ کو بہتر انداز میں منظم کرنے کے لیے حالیہ بی پی ایل گورننگ کونسل اجلاس میں نئے عہدیداران کا انتخاب کیا گیا ہے۔ تفصیلات درج ذیل ہیں:

چیئرمین: یاسر قاسمجی
وائس چیئرمین: ضیاء جوکاکو
کمشنر: طٰہ مُعلِم
ایڈیشنل کمشنر: عمران خطیب
خزانچی: عبد الستار لنکا
اکاؤنٹنٹ: افاق نائطے

بی پی ایل کمیٹی 23 اراکین پر مشتمل ہے، عہدیدار کے انتخابات کے موقع پر شہریار خطیب، جیلانی محتشم، عبد المتین ڈی ایف، عبد الباسط صوبیدار، ناشط برماور، سُفیان ایس ایم، اور عقیل سدی باپا موجود تھے۔ عہدیداران کا انتخابی عمل جیلانی محتشم کی قیادت میں مکمل کیا گیا۔