ممبئی، 14/نومبر(ایس او نیوز /ایجنسی) مہاراشٹر اسمبلی انتخابات کے لیے تمام سیاسی پارٹیاں اپنی انتخابی تشہیر میں سرگرم ہیں، اور اس دوران کانگریس پارٹی کے حوالے سے ایک بڑی خبر سامنے آئی ہے۔ کانگریس نے مہاراشٹر اسمبلی انتخابات کے آخری 5 دنوں میں اپنے تمام اہم لیڈران کو انتخابی مہم میں شامل کرنے کا منصوبہ بنایا ہے۔ لوک سبھا میں حزب اختلاف کے لیڈر راہل گاندھی، کانگریس صدر ملکارجن کھڑگے اور جنرل سکریٹری پرینکا گاندھی سمیت کئی سینئر لیڈران ریاست میں 75 انتخابی ریلیوں اور روڈ شوز کا انعقاد کریں گے۔ ان میں سے تقریباً 20 ریلیوں اور روڈ شوز میں راہل گاندھی، ملکارجن کھرگے اور پرینکا گاندھی کی شرکت متوقع ہے۔

راہل گاندھی کی مراٹھواڑہ، مغربی مہاراشٹر اور شمالی مہاراشٹر میں 6 ریلیاں ہوں گی۔ وہیں پرینکا گاندھی 13 نومبر کو وائناڈ میں ووٹ دینے کے بعد 4 ریلیوں کو خطاب کریں گی۔ کانگریس صدر ملکارجن کھرگے تقریباً 10 ریلیوں میں شرکت کریں گے۔ کانگریس پارٹی نے ودربھ، مراٹھواڑہ اور شمالی مہاراشٹر پر زیادہ توجہ مرکوز کی ہے۔

کانگریس کے 3 سرکردہ لیڈران کے علاوہ مہاراشٹر میں سچن پائلٹ اور عمران پرتاپ گڑھی کی بھی کافی ریلیاں اور روڈ شو ہوں گی۔ مسلم اکثریتی علاقوں سمیت مہاراشٹر میں عمران پرتاپ گڑھی 20 سے زیادہ انتخابی جلسوں کو خطاب کریں گے۔ دوسری جانب نوجوان لیڈر سچن پائلٹ کے کُل 8 انتخابی جلسوں میں شرکت کی امید ہے۔ جبکہ کچھ مخصوص علاقوں میں تلنگانہ کے وزیر اعلیٰ ریونت ریڈی اور کرناٹک کے وزیر اعلیٰ سدارامیا بھی کانگریس کے حق میں ووٹ مانگیں گے۔

ان سر کردہ لیڈران کے علاوہ مہاراشٹر کے اہم کانگریس لیڈران بھی انتخابی مہم کی باگ ڈور سنبھالیں گے۔ کانگریس ریاستی صدر نانا پٹولے کی 20 اور قانون ساز پارٹی کے رہنما بالا صاحب تھوراٹ کی 15 ریلیاں طئے کی گئی ہیں۔ 17 نومبر کو ممبئی میں کانگریس، شیوسینا (یو بی ٹی) اور این سی پی۔ایس پی کے سرکردہ لیڈران ایک بڑے مشترکہ سیاسی جلسہ کی تیاری کر رہے ہیں۔ اس کے علاوہ راہل گاندھی اور پرینکا گاندھی کے ایک انتخابی روڈ شو کی بھی تیاری کی جا رہی ہے۔ ساتھ ہی مہاوکاس اگھاڑی نے ریاست کے 5 کروڑ لوگوں تک انتخابی منشور میں شامل 5 گارنٹی والے کارڈ پہنچانے کے لیے ڈور ٹو ڈور مہم کی بھی تیاری کی ہے۔