دمام (سعودی عربیہ)  ، 17/ اگست (ایس او نیوز ) 15 اگست 2024  کو یوم آزادی کے موقع پر جس طرح ملک بھر میں جشن منایا گیا، اُسی طرح  دنیا کے مختلف حصوں میں بسے انڈین لوگوں نے بھی اپنے اپنے علاقوں میں  یوم آزادی  کی تقریبات منعقد کئیں۔ اسی طرح کی ایک تقریب سعودی عربیہ کے معروف شہر دمام میں  بھٹکل مسلم جماعت منطقہ شرقیہ کی جانب سے منعقد کی گئی۔

78ویں یوم آزادی  کی مناسبت سے دمام میں منعقدہ  تقریب میں کئی  ننھے منے بچوں نے   آزادی کی خوشی میں جھومتے ہوئے  ترانہ  پیش کیا جبکہ بعض  بچوں نے آزادی کی مناسبت  سے تقاریر اور اشعار  بھی پڑھ کر سامعین سے داد و تحسین حاصل کی۔

جماعت کے رکن انتطامیہ اور سنیر ممبر  ارشد کاڈلی نے یوم آزادی پرسامعین کے  سامنے پر جوش خطاب کرتے ہوئے آزادی میں اہم کردار ادا کرنے والے  مولانا ابوالکلام آزاد اور مولاناحُسین مدنی کی خدمات کو سراہتے ہوئے کہا کہ ان   دونوں کی پیدائش   سعودی عربیہ  میں ہوئی تھی۔

 جنرل سکریٹری مولوی تنویر جوشیدی نے  نظامت کی ۔ انہوں نے ہی ممبران اور مہمانوں کا استقبال کرتے ہوئے   پروگرام کی غرض و غایت بھی پیش کی۔

جماعت کے صدر جاوید کولا نے پروگرام کی صدارت سنبھالتے ہوئے کہا کہ ملک کی آزادی میں  ہزاروں مسلمانوں بالخصوص  علماء حضرات نے قربانیاں پیش کیں ہیں، جس کو نظر انداز نہیں کیا جانا چاہئے۔

جماعت کے  قدیم رکن  اور بزرگ  رہنما جناب اقبال ائیکری اور سعودی عربیہ میں  بھٹکل سے تعلق رکھنے والے معروف سماجی کارکن حبیب اللہ محتشم نے  بھی  جنگ آزادی کے موضوع   پر اپنے  تاثرات پیش کرتے ہوئے  حاضرین کی معلومات میں اضافہ کیا۔