کنداپور 23/ستمبر (ایس او نیوز/ابراہیم ایم ایچ ) کنداپور کے قریب نیشنل ہائی وے پر پیش آئے ایک سڑک حادثہ میں بھٹکل کا ایک شخص جاں بحق ہوگیا جس کی شناخت موسیٰ نگر کے رہائشی  49 سالہ محمد ناصر صدیقہ (گھاٹی)  کی حیثیت سے کی گئی ہے۔

ذرائع نے بتایا کہ  ناصر اپنے رشتہ داروں کے ساتھ کار پر سوار مینگلور سے بھٹکل واپس لوٹ رہے تھے،  کنداپور سے آگے گنگولی پولس تھانہ حدود کے آراٹے بریج کے قریب  نیشنل ہائی وے  پر کار سے کچھ آواز یں آنے کی وجہ سے ناصر صاحب نے کار کو سڑک کنارے پارک کیا اور یہ دیکھنے کے لئے  کہ آواز کہاں سے آرہی ہے، کار سے باہر نکل آئے، جانچ کرنے کے بعد وہ واپس کار پر بیٹھ ہی رہے تھے کہ دروازہ بند کرنے سے پہلے ہی  ایک بس نے  کار کے دروازے کو ٹکر ماردی، ناصر صاحب ٹکر کی زد میں آگئے اور بری طرح زخمی ہوگئے۔ اطلاع ملتے ہی گنگولی کی 24X7 ایمبولنس  موقع پر پہنچ گئی اور کار پر موجود ان کے رشتہ داروں نے  انہیں فوری طور پر کنداپور اسپتال منتقل کیا، لیکن زخموں کی تاب نہ لاکر وہ چل بسے۔ انا للہ و اناالیہ راجعون۔

پتہ چلا ہے کہ پرائیویٹ  بس کنداپور سے گنگولی جارہی تھی۔

میت فی الحال کنداپور سرکاری اسپتال منتقل کی گئی ہے۔ کاغذی کاروائیوں کے بعد  بھٹکل لائی جائے گی۔

مزید تفصیلات کے لئے انتظار کریں۔