بیلتنگڈی : پتھروں کی غیر قانونی کھدائی کے خلاف پولیس کی کارروائی - پولیس کو دھمکی دینے پر رکن اسمبلی ہریش پونجا دی پر درج ہوئی ایف آئی آر
بیلتنگڈی، 20 مئی (ایس او نیوز) غیر قانونی طور پر پتھروں کی کھدائی کرنے والوں کے خلاف پولیس نے اقدام کرتے ہوئے اس معاملے میں ملوث بی جے پی یووا مورچہ کے صدر ششی راج شیٹی کو جب گرفتار کیا تو ایم ایل اے ہریش پونجا نے خود پولیس اسٹیشن پہنچ کر پولیس کے ساتھ بدتمیزی سے پیش آنے کے علاوہ انہیں دھمکیاں دی تھی ۔ اس پر کارروائی کرتے ہوئے بیلتنگڈی پولیس نے ہریش پونجا کے خلاف ایف آئی درج کی ہے ۔
ہریش پونجا کے خلاف پولیس کی جانب سے درج کی گئی ایف آئی آر کے مطابق 18 مئی کی رات کو ایم ایل اے ہریش پونجا اور دیگر بی جے پی کارکنان نے بیلتنگڈی پولیس اسٹیشن پہنچ کر پتھروں کی غیر قانونی کھدائی اور خطرناک دھماکو مادہ ذخیرہ کرنے کے الزام میں گرفتار کیے گئے کلیدی ملزم راوڈی شیٹر ششی راج شیٹی کو رہا کرنے مطالبہ کرنے لگے ۔ پولیس اسٹیشن میں دھرنا دیتے ہوئے پولیس کو نہ صرف اپنی ذمہ داری ادا کرنے سے روکنے کی کوشش کی بلکہ ناشائستہ اور نا زیبا زبان استعمال کرتے ہوئے پولیس افسران کو دھمکانے لگے ۔
خیال رہے کہ اس سے قبل محکمہ جنگلات کے افسران نے کلینجا نامی علاقے میں جب جنگلاتی زمین پر ناجائز قبضہ روکنے کی کوشش کی تھی تو اس وقت بھی ہریش پونجا نے مداخلت کی تھی اور سرکاری افسران کی طرف سے ڈیوٹی انجام دینے کے راستے میں رکاوٹ کھڑی کی تھی ۔ اس تعلق سے بھی ایم ایل اے پونجا کے خلاف دھرمستھلا پولیس اسٹیشن میں کیس درج کیا گیا تھا ۔
اس معاملے پر اپنا رد عمل ظاہر کرتے ہوئے وزیر صحت دنیش گنڈو راو نے کہا کہ پتھروں کی غیر قانونی کھدائی کے ملزم بی جے پی یووا مورچہ لیڈر ششی راج شیٹی کی حمایت میں کھڑے ہو کر ایم ایل اے ہریش پونجا نے سماج میں امن و امان بنائے رکھنے والی پولیس کے ساتھ غنڈہ گردی کا رویہ اختیار کیا ہے ۔ یہ ایک ناقابل معافی رویہ ہے ۔ اسے برداشت نہیں کیا جائے گا ۔
کانگریس پارٹی کی طرف سے کہا گیا ہے کہ بی جے پی والے ریاست میں امن و امان کی صورت حال کو خراب کرنے کی کوششوں میں مصروف ہیں ۔ بیلتنگڈی ایم ایل اے ہریش پونجا نے پولیس تھانے میں گھس کر پولیس افسران کو جس طرح دھمکی دی ہے اس سے ثابت ہوتا ہے کہ بی جے پی والے مجرموں کے ساتھ کھڑے ہیں ۔ بی جے پی والوں کی اس طرح کی کارروائیوں پر روک لگانے کے لئے ہماری حکومت پوری طرح اہل ہے ۔