دہلی میں قانون و انتظامیہ ناکام، خواتین اور کاروباری طبقہ خوفزدہ، کیجریوال کی مرکز پر تنقید
نئی دہلی، یکم دسمبر (ایس او نیوز /ایجنسی)دہلی میں قانون کے نظام کی خراب صورتحال پر عام آدمی پارٹی کے قومی کنوینر اروند کیجریوال نے ایک بار پھر مرکزی حکومت کی بی جے پی کو سخت تنقید کا نشانہ بنایا ہے۔ ایک پریس کانفرنس میں خطاب کرتے ہوئے انہوں نے کہا کہ دہلی میں ایک خوف کا ماحول چھایا ہوا ہے، خواتین میں عدم تحفظ کا احساس بڑھ رہا ہے، دارالحکومت گینگسٹرز کے ہاتھوں میں ہے، اور یہاں کا قانون و انتظام پوری طرح سے متاثر ہو چکا ہے۔
اروند کیجریوال نے کہا کہ پوری دہلی کے اندر کاروباریوں کے پاس تاوان کے لیے فون کال آ رہے ہیں۔ کوئی اگر نہیں سنتا ہے تو اگلے ہی دن اس کے گھر یا دکان کے باہر فائرنگ کی جاتی ہے، وہ ایک پرچی بھی چھوڑ جاتے ہیں جس میں دھمکی دی جاتی ہے۔
انہوں نے کہا کہ میں یہ سب معاملے مسلسل اٹھا رہا ہوں، میرے اوپر کل 'پد یاترا' کے دوران ایک مادّہ پھینکا گیا۔ کل میرے ایک ایم ایل اے کو گرفتار کر لیا گیا جبکہ ایم ایل اے بھی گینگسٹر سے پریشان ہیں۔ ان کے پاس بھی گینگسٹر کا فون آ رہا تھا اور انہیں دھمکی دی جا رہی تھی۔ 2023 میں اس سلسلے میں پولیس میں شکایت درج کرائی تھی، اس کے بیٹے کو جان سے مارنے کی دھمکی دی گئی۔ 30 سے 40 بار ایم ایل اے کو گینگسٹر کی طرف سے دھمکی دی گئی۔
اس دوران اروند کیجریوال نے وزیر داخلہ امیت شاہ کو چیلنج کرتے ہوئے کہا کہ اگر ہمت ہے تو گینگسٹر کو گرفتار کرکے دکھاؤ۔ ہمارے ایم ایل اے کو گرفتار کرکے کیا ہوگا؟ ہمارے اوپر کچھ پھینکوا کر کیا ہوگا؟ ہم بار بار آواز اٹھا رہے ہیں کہ جرائم روکو اور ہم اسے آگے بھی اٹھاتے رہیں گے۔ آج دہلی کے لوگ بہت خوف زدہ ہیں، کاروباری ہمیشہ خوف میں مبتلا رہتے ہیں کہ کب انہیں تاوان کے لیے کوئی فون نہ آ جائے۔
پریس کانفرنس میں اروند کیجریوال نے دہلی میں اتحاد کے سوال پر بھی اپنی بات کہی۔ انہوں نے کہا کہ دہلی انتخابات میں کوئی اتحاد نہیں ہوگا۔ پارٹی یہاں اکیلے انتخاب لڑے گی اور سبھی 70 اسمبلی سیٹوں پر اپنے امیدواروں کو کھڑا کرے گی۔
