نئی دہلی،22/اکتوبر(ایس اونیوز  /ایجنسی)مشرقی لداخ میں تعطل کے خاتمے کے لیے ہندوستان اور چین کے درمیان معاہدے کے بعد، ہندوستانی فوج کے جنرل اوپیندر دویدی نے اہم بیان دیا ہے۔ منگل، 22 اکتوبر 2024 کو، انہوں نے اے این آئی کو بتایا کہ ہندوستانی افواج تب ہی چین سے پیچھے ہٹیں گی جب لائن آف ایکچوئل کنٹرول (ایل اے سی) کی صورتحال اپریل 2020 کے جمود پر واپس آ جائے گی۔ جنرل دویدی نے مزید کہا کہ فوج چینی فریق کے ساتھ اعتماد بحال کرنے کی کوشش کر رہی ہے، جس نے ایل اے سی کو غیر مستحکم کرنے کے لیے جارحانہ سرگرمیاں انجام دی تھیں۔

ان کے مطابق، ہم اپریل 2020 کے جمود پر واپس جانا چاہتے ہیں۔ اس کے بعد ہم فوجوں کے انخلاء، کشیدگی کو کم کرنے اور ایل اے سی پر عمومی نظم و نسق پر توجہ مرکوز کریں گے۔ اپریل 2020 سے ہمارا یہی موقف ہے۔ اب تک ہم کوشش کر رہے ہیں۔اعتماد بحال کرنے کے لیے یہ اس وقت ہوگا جب ہم ایک دوسرے کو دیکھ سکیں گے اور ہم ایک دوسرے کو یقین دلانے کے قابل ہو جائیں گے کہ ہم بفر زون میں داخل نہیں ہو رہے ہیں۔درحقیقت، ایک دن پہلے پیر (21 اکتوبر 2024) کو، ہندوستان اور چین نے ایل اے سی پر گشت کے لیے ایک اہم معاہدے پر اتفاق کیا۔

سکریٹری خارجہ وکرم مصری کی جانب سے بتایا گیا کہ اس معاہدے کو دونوں فریقوں کے درمیان گزشتہ کئی ہفتوں سے بات چیت کے بعد حتمی شکل دی گئی ہے اور اس سے 2020 میں پیدا ہونے والے تعطل کے حل کی راہ ہموار ہوگی۔یہ سمجھا جاتا ہے کہ یہ معاہدہ ڈیپسانگ اور ڈیم چوک میں گشت کے آغاز کی نشاندہی کرے گا، کیونکہ دونوں علاقے کئی مسائل پر تعطل کا شکار تھے۔ جون 2020 میں وادی گلوان میں شدید جھڑپ کے بعد ہندوستان اور چین کے درمیان تعلقات کافی خراب ہوگئے تھے۔

یہ جھڑپ گزشتہ چند دہائیوں میں دونوں فریقوں کے درمیان ہونے والی سب سے ہلاکت خیز فوجی جھڑپ تھی۔برسوں کے دوران، فوجی اور سفارتی بات چیت کے کئی دور کے بعد، دونوں فریق تنازع کے کئی نکات سے پیچھے ہٹ گئے تھے، لیکن ڈیپسانگ ڈیمچوک میں تعطل حل نہیں ہو سکا۔ وزیر خارجہ ڈاکٹر ایس جے شنکر نے ایل اے سی پر گشت کے انتظامات کے تازہ ترین معاہدے کو ‘مثبت قدم’ قرار دیا۔ تاہم، انہوں نے نتائج کے بارے میں قبل از وقت پیشین گوئیاں نہ کرنے کا مشورہ دیا۔