انکولہ : فلمی انداز میں ڈھائی لاکھ روپے مالیت کی موٹر بائک لے کر چور فرار
انکولہ 17 ڈسمبر : (ایس او نیوز) نیشنل ہائی وے 66 پر واقع یماہا شو روم کے سامنے سے تقریباً ڈھائی لاکھ روپے مالیت کی موٹر بائک لے کر ایک لُٹیرا فلمی انداز میں فرار ہوگیا اور بائک مالک منہ دیکھتا رہ گیا۔ یہ واردات انکولہ میں جمعہ کے روز پیش آئی ہے۔
ذرائع سے ملی اطلاع کے مطابق اروند تانڈیل نامی شخص ایک ہفتے پہلے خریدی ہوئی اپنی کے ٹی ایم ڈیوک بائک پر ہو کر یماہا شو روم پہنچا اور گاڑی پارک کرنے کے بعد مرمت کے لئے دی گئی ایک اسکوٹی کے بارے میں دریافت کرکے جب باہر نکلا تو اسپلینڈر بائک پر آنے والے ایک اجنبی شخص نے اروند سے اس کی نئی بائک کی خصوصیات معلوم کرنے لگا ۔
اروند نے اسے بائک کی خصوصیات بتاتے ہوئے کہا اس کی قیمت تقریباً 2.5 لاکھ روپے ہے ۔ اس اجنبی شخص نے کہا کہ چونکہ وہ بھی ایسی بائک خریدنا چاہتا ہے اس لئے اگر اس بائک پر اسے ذرا سا ٹیسٹ ڈرائیو کرنے کا دے گا تو مہربانی ہوگی ۔ اروند اس کے لئے راضی ہوا تو وہ شخص اپنی اسپلینڈر بائک وہیں چھوڑ کر اروند کی کے ٹی ایم ڈیوک بائک لے کر ٹسیٹ ڈرائیو کے لئے نکل گیا ۔ پھر بڑی دیر تک انتظار کرنے کے بعد بھی وہ اجنبی شخص واپس نہیں لوٹا تو اروند کو احساس ہوگیا کہ اسے ٹھگ لیا گیا ہے ۔
اس سلسلے میں اروند نے انکولہ پولیس اسٹیشن میں شکایت درج کروائی ہے ۔ چونکہ بائک اڑا لے جانے والے کا چہرا سی ٹی وی کیمرے میں قید ہوا ہے ، اس لئے پولیس اس کی تلاش میں سرگرم ہوگئی ہے ۔