بھٹکل انجمن کالج کی طرف سے 'سوچھ ساگر، سرکشت ساگر' صفائی پروگرام
بھٹکل، 3 / اکتوبر (ایس او نیوز) انجمن کالج کی این ایس ایس اور این سی سی یونٹ کی طرف سے بھٹکل کے ماوین کوروا ساحل پر 'سوچھ ساگر، سرکشت ساگر' کے عنوان سے بڑی کامیابی کے ساتھ صفائی مہم چلائی گئی ۔ یہ پروگرام ماوین کوروے گرام پنچایت کے تعاون سے مرکزی وزارت یوتھ افیئرس اینڈ اسپورٹس کی ہدایت کے مطابق منعقد کیا گیا ۔
'سوچھتا ہی سیوا' مہم کے اختتامی پروگرام کے طور پر منعقدہ اس مہم میں انجمن کالج کے این ایس ایس اور این سی سی سے وابستہ طلبہ ، اساتذہ اور عملے کے افراد نے ساحل پر ادھر اُدھر پڑے ہوئے کچرے کے ڈھیر کو ہٹاتے ہوئے اس علاقے کو صاف کرنے کی کارروائی بڑی خوش اسلونی سے انجام دی ۔
طلبہ نے پورے جوش و خروش کے ساتھ اس مہم میں حصہ لیتے ہوئے جو بڑے پیمانے پر کچرے ڈھیر جمع کیا تھا اسے ٹھکانے لگانے کی ذمہ داری ماوین کوروا گرام پنچایت نے سنبھالی ۔
اس موقع پر این ایس ایس آفیسر پروفیسر آر ایس نائیک نے صفائی ستھرائی کی اہمیت سمجھائی ۔ ماوین کوروے گرام پنچایت کے دفتر میں منعقدہ گاندھی جینتی پروگرام میں طلبہ اور اساتذہ نے شرکت کی ۔ کالج کے پرنسپال پروفیسر ایم کے شیخ اور گرام پنچایت کے افسران نے گاندھی جی کے پیغام پر روشنی ڈالتے ہوئے کہا کہ ماحول کو صاف ستھرا رکھنا ہر ایک شہری کے فرائض میں شامل ہے ۔
