کانگریس کی انتخابی شکست کی جانچ کرنے کمیٹی قائم کی جا ئے گی، پارٹی کو مضبوط کرنے کیلئے متعدد شعبے قائم کرنے کے پی سی سی عہدیداروں کی میٹنگ میں فیصلہ
بنگلورو، 2 /جولائی (ایس او نیوز ) نائب وزیر اعلیٰ اور کے پی سی سی صدر ڈی کے شیو کمار نے کہا ہے کہ حالیہ لوک سبھا انتخابات میں کانگر یس پارٹی کی توقعات کے برخلاف ناقص مظاہرہ کے اسباب کا جائز ہ لینے کیلئے جانچ کمیٹی قائم کی جائے گی۔ یہ اعلان پیر کے روز انہوں نے کے پی سی سی دفتر کے بھارت جوڑو آڈیٹوریم میں منعقدہ کے پی سی سی عہدیدارو ں کے اجلاس سے خطاب کرتے ہوئے کیا۔
انہوں نے پارٹی کارکنوں کو وارننگ دی کہ جن کارکنوں نے پارٹی کے امیدواروں کے حق میں دیانتداری سے کام نہیں کیا، ان کے خلاف بلا مروت کارروائی کی جائے گی۔ اس میٹنگ کے بعد تفصیلات میڈیا کو دیتے ہوئے شیو کمار نے کہا کہ کانگریس پارٹی کو ریاست میں لوک سبھا 15 سے زیادہ سیٹوں پر کامیابی کی امید تھی، لیکن یہ امید چند لوگوں کی لاپروائی کے سبب جھوٹی ہو گئی۔
انہوں نے کہا کہ کلیان کرناٹک کو چھوڑ کر ریاست کے دیگر حصوں میں پارٹی کو شکست کیوں ہوئی، اس کی جانی سختی سے کی جائے گی ، اس کیلئے کمیٹی تشکیل دی جائے گی جو ہر اسمبلی حلقہ میں پارٹی کی شکست کے اسباب کا جائزہ لے گی ۔ انہوں نے کہا کہ حالانکہ ایکزٹ پول میں کہا گیا تھا کہ کا نگریس کو ایک یا دو سیٹوں پر کامیابی ملے گی ۔ کانگریس نے بھلے ہی 19 سیٹوں پر کامیابی حاصل کی ہے لیکن یہ جیت اطمینان بخش نہیں ہے۔
انہوں نے کہا کہ گارنٹی اسکیموں کو اتنی کامیابی سے نافذ کرنے کے باوجود بھی عوام نے کیوں کا نگریس کا ساتھ نہیں دیا، اس کا محاسبہ کرنے کی ضرورت ہے۔ کرناٹک میں اس بار مودی لہر بالکل نہیں تھی ۔ بی جے پی کی مانند کانگریس میں داخلی اختلافات بھی نہیں تھے۔ اتحاد کے ساتھ وزیر اعلی اور انہوں نے چناؤ کا سامنا کیا، پھر بھی پارٹی کو متوقع جیت نہیں مل سکی تو اس بات کا جائزہ لینا ہی پڑے گا۔
انہوں نے کہا کہ ریاست میں پارٹی کی شکست کے اسباب کا جائزہ لینے کیلئے اے آئی سی سی کی جانچ کمیٹی جلد ہی بنگلورو کا دورہ کرنے والی ہے۔ اس میٹنگ میں بی جے پی کی قیادت والی این ڈی اے حکومت کے گھپلوں کے خلاف قرار داد منظور کی گئی۔ شیو کمار نے کہا کہ حالیہ کونسل انتخابات میں کانگریس نے وقت سے پہلے امیدواروں کا اعلان کر دیا جس سے پارٹی کو جیتنے میں آسانی ہوئی۔ یہی فارمولہ اب تمام انتخابات کیلئے اپنایا جائے گا۔
شیو کمار نے کہا کہ ریاست کے تین اسمبلی حلقوں کے ضمنی انتخابات کا سامنا کرنے کیلئے ایک کمیٹی تشکیل دی گئی ہے، اس کمیٹی نے شگا ؤں حلقہ سے متعلق رپورٹ دے دی ہے۔ 3 جولائی کے بعد سندور حلقہ کی رپورٹ ملے گی اور اس کے بعد وزیر زراعت چلورا یا سوامی چین پٹن حلقہ کے بارے میں رپورٹ پیش کریں گے۔
شیو کمار نے کہا اب تک تک بہت سارے اراکین اسمبلی اپنے گھروں میں پارٹی میٹنگ کا اہتمام کرتے ۔ آئندہ سے اراکین اسمبلی کی رہائش گاہوں پر پارٹی کی میٹنگ نہیں ہوگی ۔ اگر اس تنبیہ کے بعد گھر میں پارٹی میٹنگ کی گئی تو ایسا کرنے والے اراکین اسمبلی پر کارروائی کی جائے گی۔ اس طرح کی میٹنگوں میں دیکھا گیا ہے کہ اراکین اسمبلی کے حامیوں کی بھر مار رہتی ہے اور پارٹی کارکن موجود نہیں رہتے۔ اسے اب جاری نہ رکھا جائے۔
انہوں نے کہا کہ پانچ سال یا دو میعادوں کے لئے ضلع یا بلاک صدور رہ چکے وہ رہنما جو پارٹی میں متحرک نہیں ان کو عہدے سے ہٹانے کا فیصلہ لیا گیا ہے شیو کمار نے کہا کہ پارٹی میں چند نئے شعبے قائم کئے جائیں گے، ان میں ٹرانسپورٹ، سلم ڈیولپمنٹ کو آپریشن، اپارٹمنٹ ویلفیر شامل ہیں۔ انہوں نے کہا کہ بنگلورو کے تمام لوگ سبھا حلقوں میں اپارٹمنٹ موجود ہیں، ان اپارٹمنٹوں میں چارلا کھ سے زیادہ لوگ آباد ہیں۔ انہوں نے کہا کہ آٹو ڈرائیورس اور دیگر ڈرائیورو ں کیلئے ایک الگ شعبہ بنایا جائے گا۔