نئی دہلی، 20/نومبر (ایس او نیوز /ایجنسی) دہلی سے گوا جانے والی ایئر انڈیا کی پرواز میں ایک خاتون مسافر کو جنسی ہراسانی کا سامنا کرنا پڑا۔ خاتون نے پولیس میں شکایت درج کراتے ہوئے بتایا کہ دوران پرواز ایک مرد مسافر نے اسے جنسی طور پر ہراساں کیا۔ خاتون کی شکایت پر کارروائی کرتے ہوئے پولیس نے ملزم کو گرفتار کر لیا ہے۔

شکایت کے مطابق دہلی کے جنک پوری کی رہنے والی ایک خاتون منگل کو دہلی سے گوا کے لیے ایئر انڈیا کی فلائٹ میں سفر کر رہی تھی۔ منگل کی صبح 11 بجے سے دوپہر 1:20 کے درمیان، طیارے میں اس کے ساتھ والی سیٹ پر بیٹھے ایک مسافر نے کمبل کھینچ لیا اور مبینہ طور پر مشت زنی شروع کر دی۔

ملزم نے جان بوجھ کر متاثرہ کے سامنے کمبل کھلا رکھا۔ جب طیارہ جنوبی گوا کے دابولم کے گوا انٹرنیشنل ایئرپورٹ پر اترا تو خاتون نے ملزم نوجوان کے خلاف پولیس سے شکایت کی۔ اس کے بعد دبولم ایئرپورٹ پولیس نے نوجوان کو گرفتار کرلیا۔ پولیس نے بتایا کہ ملزم نوجوان کی شناخت پانی پت، ہریانہ کے رہنے والے جتیندر جنگیان کے طور پر ہوئی ہے۔

پولیس نے کہا کہ ملزم کے خلاف انڈین جسٹس کوڈ کی دفعہ 75 (جنسی طور پر ہراساں کرنا) اور 79 (زبانی توہین، نامناسب اشارہ اور عورت کی عزت کو مجروح کرنے کے ارادے بشمول رازداری پر حملہ) کے تحت مقدمہ درج کیا گیا ہے۔