کنداپور: ایم ایس کی تیاری کر رہے ایک ڈاکٹر کی خودکشی
کنداپور 19 / ستمبر (ایس او نیوز) کنداپور تعلقہ کے کوٹیشورا میں ایک ایم بی بی ایس کی ڈگری مکمل کرنے کے بعد ایم ایس کی تیاری کر رہے نوجوان ڈاکٹر نے کل رات کوٹی لنگیشور تالاب میں کود کر خود کشی کر لی ۔
ذرائع سے ملی اطلاع کے مطابق خودکشی کرنے والے ڈاکٹر کا نام گوریش گانیگا (28 سال) بتایا گیا ہے ۔ جس کے تعلق سے بتایا جاتا ہے کہ وہ ایک سادہ مزاج انسان تھا اور ایم بی بی ایس کی تکمیل کے بعد کنداپور گورنمنٹ ہاسپٹل میں پریکٹس کر رہا تھا ۔ اس نے ایم ایس کا اینٹرنس امتحان دیا تھا اور پچھلے کئی دنوں سے ڈپریشن کا شکار نظر آ رہا تھا ۔
کل شام سے جب گوریش گھر سے غائب ہوگیا اور کہیں بھی اس کا پتہ نہیں چلا تو گھر والے گم شدگی کی شکایت درج کرنے کنداپور پولیس اسٹیشن پہنچے ۔ وہاں سے اس کے موبائل فون کا لوکیشن کوٹیشورا تالاب کے قریب ہونے کا پتہ چلا ۔ وہاں پہنچنے پر اس کی بائک مندر کے قریب پارک کی ہوئی ملی جبکہ اس کا موبائل فون اور چپل تالاب کے کنارے رکھے ہوئے پائے گئے ۔ چونکہ دیر رات کا وقت تھا اس لئے تلاشی مہم شروع نہیں کی گئی مگر آج صبح گوریش کی لاش تالاب سے بازیافت کی گئی ۔
خود کشی جیسے انتہائی اقدام کا سبب ابھی معلوم نہیں ہوا ہے ۔ کنداپور پولیس اس معاملے کی تحقیقات کر رہی ہے ۔