بلڈھانہ،21/فروری (ایس او نیوز/ایجنسی) مہاراشٹر کے بلڈھانہ میں ’پرساد‘ کھانے سے تقریباً 200 افراد بیمار پڑ گئے ہیں۔ بڑی تعداد میں لوگوں کی طبیعت ناساز ہونے سے علاقہ میں بھی افرا تفری کا ماحول دیکھنے کو مل رہا ہے۔ بتایا جاتا ہے کہ بلڈھانہ میں ایک مذہبی تقریب کے دوران سینکڑوں لوگوں نے پرساد کھایا تھا، جن میں سے کم و بیش 200 لوگ اتنے بیمار ہوئے کہ انھیں اسپتال کا رخ کرنا پڑا۔

میڈیا رپورٹس کے مطابق مذہبی تقریب کا انعقاد بلڈھانہ کے لونار واقع سومتھانا گاؤں میں منگل کے روز ہوا تھا۔ اس میں شرکت کے لیے بڑی تعداد میں لوگ پہنچے تھے۔ افسران کا کہنا ہے کہ مذہبی تقریب کا نام ’ہرینام ہفتہ‘ تھا جہاں رات کو پرساد کی تقسیم کی گئی تھی۔ اسے کھا کر تقریباً 200 گاؤں والے بیمار ہو گئے۔ بیشتر لوگوں نے اس دوران الٹی ہونے کی شکایت کی۔ ان میں سے 142 لوگوں کو مقامی دیہی اسپتال میں داخل کرایا گیا، جبکہ 20 دیگر کو لونار اور 35 مریضوں کو مہکر میں ایک ہیلتھ سنٹر میں بغرض علاج داخل کرایا گیا۔

اس معاملے پر نظر رکھنے والے افسروں کا کہنا ہے کہ سبھی مریض کی حالت مستحکم ہے اور کئی مریضوں کو تو بدھ کے روز چھٹی بھی مل گئی ہے۔ کسی ایمرجنسی والی حالت سے نمٹنے کے لیے ڈاکٹروں کی ایک ٹیم گاؤں روانہ کی گئی ہے۔ اس کے ساتھ ہی پولیس نے پرساد کا نمونہ حاصل کر لیا ہے جس کی جانچ لیباریٹری میں ہوگی اور پھر اس رپورٹ کی بنیاد پر معاملے کی تحقیقات کی جائے گی۔