بیروت،23/اکتوبر (ایس او نیوز /ایجنسی)فرانسیسی خبر رساں ایجنسی ’اے ایف پی‘ کی جانب سے شائع کردہ ایک رپورٹ کے مطابق، 23 ستمبر کو اسرائیل کی جانب سے لبنان میں فضائی حملوں کی شدت میں اضافہ کرنے کے بعد سے اب تک کم از کم 1,552 افراد ہلاک ہو چکے ہیں۔ لبنانی وزارت صحت نے پیر کے روز بتایا کہ ایک ہی دن میں اسرائیلی حملوں میں 63 افراد جان کی بازی ہار گئے، جن میں حریری ہسپتال کے قریب واقع علاقے پر کیے گئے حملے میں ہلاک ہونے والے 18 افراد بھی شامل ہیں، جن میں چار بچے بھی تھے۔ یہ صورت حال لبنان میں انسانی بحران کی شدت کو مزید بڑھا رہی ہے۔

کل منگل کی شام حزب اللہ نے حیفا کے جنوب میں ایک اسرائیلی فوجی اڈے پر ڈرون کے ساتھ بمباری کا دعویٰ کیا۔ حزب اللہ نے ایک بیان میں کہا ہے کہ اس نے منگل کی شام مقامی وقت کے مطابق 06:55 پرحیفا کے جنوب میں ’ایلیاکیم‘ بیس پر حملہ آور ڈرون کے اسکواڈرن کے ساتھ ایک فضائی حملہ کیا۔ حزب اللہ نے منگل کے روز یکے بعد دیگرے بیانات میں لبنانی قصبوں کے اندر اور سرحد کے اس پار سات اسرائیلی مرکاوا ٹینکوں کو نشانہ بنانے کا بھی اعلان کیا۔حزب اللہ نے ایک بیان میں یہ بھی اعلان کیا کہ اس کے ارکان نے لبنانی فضائی حدود میں اسرائیلی ہرمز 450 ڈرون کا مقابلہ کیا اور اسے پسپا کردیا گیا۔

اسرائیلی جنگی طیارے لبنان کے مختلف علاقوں پر اپنے حملے جاری رکھے ہوئے ہیں، جب کہ حزب اللہ اسرائیل کی جانب میزائل داغ رہا ہے۔محاذ جنگ کی تازہ ترین پیش رفت کے مطابق اسرائیلی فوج نے اعلان کیا ہے کہ اس نے لبنان سے اسرائیل کی طرف داغے گئے تقریباً 10 میزائلوں کی نگرانی کی اور ان میں سے بیشتر کومار گرایا گیا۔ منگل کو فوج کے پریس آفس کے بیان میں کہا گیا ہے کہ شمالی اسرائیل میں نیوٹ مورڈیچائی قصبے کے قریب اس وقت سائرن بجائے گئے جب علاقے میں ایک راکٹ گرا۔

اطلاع کے مطابق شمالی اسرائیل کے علاقے الجلیل میں نہاریہ اور اس کے اطراف میں میزائل داغے گئے۔لبنان سے اسرائیل کے شمال میں داغے گئے میزائل کے نتیجے میں منگل کو چھ اسرائیلی زخمی ہوگئے جن میں سے بعض کی حالت خطرے میں بیان کی جاتی ہے۔اسرائیلی چینل 13 نے آج اطلاع دی ہے کہ لبنان سیکی جانے والی گولہ باری کے بعد بالائی الجلیل میں کبوتز نیوٹ مارکادی کے علاقے میں تین شہری شدید زخمی اور تین معمولی زخمی ہوئے۔

انہوں نے مزید کہا کہ لبنان سے نیوٹ مورڈیچائی کے علاقے تک تقریباً 10 میزائلوں کے داغے جانے کا پتا چلا ہے۔ ان میں سے بعض کو مار گرایا گیا ۔عبرانی ٹی وی چینل نے کہا کہ لبنان سے تقریباً 30 لانچنگ آپریشنز کے نتیجے میں نہاریہ اور مغربی الجلیل میں سائرن بھی سنے گئے ۔