ನವದೆಹಲಿ: ಬುಲ್ಡೋಜರ್ ನ್ಯಾಯದ ವಿರುದ್ಧ APCR ಸಲ್ಲಿಸಿದ್ದ ಎರಡು ಅರ್ಜಿಗಳನ್ನು ಸುಪ್ರೀಂ ಕೋರ್ಟ್ ಅಂಗೀಕರಿಸಿದೆ. ಇತ್ತೀಚೆಗಿನ ಬುಲ್ಡೋಜರ್ ಕಾರ್ಯಾಚರಣೆಯಲ್ಲಿ ಇಬ್ಬರ ಮನೆಗಳನ್ನು ನೆಲಸಮಗೊಳಿಸಿದ ಪ್ರಕರಣಕ್ಕೆ ಸಂಬಂಧಿಸಿ APCR ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿತ್ತು.
ಈ ಪ್ರಕರಣಗಳು ರಾಜಸ್ಥಾನದ ಉದಯಪುರ ಮತ್ತು ಮಧ್ಯಪ್ರದೇಶದ ಜವ್ರಾಗೆ ಸಂಬಂಧಿಸಿದೆ.
ಉದಯಪುರದಲ್ಲಿ ರಶೀದ್ ಖಾನ್ ಅವರ ಮನೆಯನ್ನು ಬುಲ್ಡೋಜರ್ನಿಂದ ಕೆಡವಲಾಗಿದೆ. ರಶೀದ್ ಖಾನ್ ಅವರ ಬಾಡಿಗೆದಾರರ ಪುತ್ರನ ವಿರುದ್ಧದ ಆರೋಪದ ಹಿನ್ನೆಲೆಯಲ್ಲಿ ಆಡಳಿತವು ಈ ಕ್ರಮ ಕೈಗೊಂಡಿದ್ದು, ಯಾವುದೇ ಕಾನೂನು ಪ್ರಕ್ರಿಯೆಯಿಲ್ಲದೆ ರಶೀದ್ ಖಾನ್ ಅವರ ಮನೆಯನ್ನು ನೆಲಸಮಗೊಳಿಸಿತ್ತು.
ಮಧ್ಯಪ್ರದೇಶದ ಜಾವ್ರಾದಲ್ಲಿರುವ ಮುಹಮ್ಮದ್ ಹುಸೇನ್ ಅವರ ತಂದೆಯ ಮನೆಯ ಒಂದು ಭಾಗವನ್ನು ಅವರ ಮಗನ ಮೇಲಿನ ಆರೋಪದ ಆಧಾರದ ಮೇಲೆ ಕೆಡವಲಾಯಿತು. ಸೂಕ್ತ ಕಾನೂನು ಪ್ರಕ್ರಿಯೆ ಇಲ್ಲದೆ ಈ ಕ್ರಮವನ್ನೂ ಕೈಗೊಳ್ಳಲಾಗಿದೆ.
ಈ ಪ್ರಕರಣಗಳ ವಿಚಾರಣೆ ವೇಳೆ ಸುಪ್ರೀಂ ಕೋರ್ಟ್ ರಾಜಸ್ಥಾನ ಮತ್ತು ಮಧ್ಯಪ್ರದೇಶ ಸರ್ಕಾರಗಳಿಗೆ ನೋಟಿಸ್ ಜಾರಿ ಮಾಡಿದೆ. ಮುಂದಿನ ವಿಚಾರಣೆಯಲ್ಲಿ, ದೇಶಾದ್ಯಂತ ಇಂತಹ ಬುಲ್ಡೋಜಿಂಗ್ ಕಾರ್ಯಾಚರಣೆಗಳನ್ನು ನಿಲ್ಲಿಸಲು ಮಾರ್ಗಸೂಚಿಗಳನ್ನು ರಚಿಸುವುದನ್ನು ಪರಿಗಣಿಸಲಾಗುವುದು ಎಂದು ಸುಪ್ರೀಂ ಕೋರ್ಟ್ ಸೋಮವಾರ ತಿಳಿಸಿತ್ತು.
ಈ ಪ್ರಕರಣವನ್ನು 2022 ರ ಜಹಾಂಗೀರ್ಪುರಿ ಬುಲ್ಡೋಜರ್ ಘಟನೆಯ ವಿಷಯದಲ್ಲಿ ಜಮಿಯತ್ ಉಲೇಮಾ-ಎ-ಹಿಂದ್ ಮತ್ತು ವೃಂದಾ ಕಾರಟ್ ಅವರು ಈಗಾಗಲೇ ಸಲ್ಲಿಸಿರುವ ಸಾರ್ವಜನಿಕ ಹಿತಾಸಕ್ತಿ ಮೊಕದ್ದಮೆಗೆ (ಪಿಐಎಲ್) ಲಗತ್ತಿಸಲಾಗಿದೆ.
ಎಪಿಸಿಆರ್ ಪರವಾಗಿ ಹಿರಿಯ ವಕೀಲ ಚಂದರ್ ಉದಯ್ ಸಿಂಗ್ ಮತ್ತು ಎಒಆರ್ ಫೌಜಿಯಾ ಶಕೀಲ್ ನ್ಯಾಯಾಲಯಕ್ಕೆ ಹಾಜರಾಗಿದ್ದರು. ಇತ್ತೀಚೆಗೆ ಉತ್ತರ ಪ್ರದೇಶದ ನಾಮಫಲಕ ವಿವಾದ ಪ್ರಕರಣದಲ್ಲೂ ಅವರು ವಕಾಲತ್ತು ವಹಿಸಿದ್ದರು. ಈ ಪ್ರಕರಣದಲ್ಲಿ ಜಮಿಯತ್ ಪರವಾಗಿ ಹಿರಿಯ ವಕೀಲ ದುಷ್ಯಂತ್ ದವೆ ವಾದ ಮಂಡಿಸಿದರೆ, ಎಪಿಸಿಆರ್ ಪರವಾಗಿ ಚಂದರ್ ಉದಯ್ ಸಿಂಗ್ ನ್ಯಾಯಾಲಯದ ಮುಂದೆ ವಾದ ಮಂಡಿಸಿದರು. ಎಪಿಸಿಆರ್ ರಾಷ್ಟ್ರೀಯ ಸಂಯೋಜಕ ವಕೀಲ ಎಂ ಹುಝೈಫಾ ಕೂಡ ಈ ಪ್ರಕರಣದಲ್ಲಿ ವಕೀಲರಾಗಿದ್ದಾರೆ.
ಸೂಕ್ತ ಕಾನೂನು ಕ್ರಮದಲ್ಲಿ ಮಾತ್ರ ಬುಲ್ಡೋಜರ್ ಕ್ರಮ ಕೈಗೊಳ್ಳುವಂತೆ ಮಾರ್ಗಸೂಚಿ ರೂಪಿಸಬೇಕು, ಯಾರ ಮನೆಯನ್ನು ಕೆಡವಲು ಆಡಳಿತಕ್ಕೆ ಮುಕ್ತ ಅವಕಾಶ ನೀಡಬಾರದು ಎಂದು ಎಪಿಸಿಆರ್ ಪರವಾಗಿ ವಕೀಲರು ಆಗ್ರಹಿಸಿದರು. ಈ ಬೇಡಿಕೆಯನ್ನು ಒಪ್ಪಿಕೊಂಡಿರುವ ಸುಪ್ರೀಂ ಕೋರ್ಟ್ ಸೆಪ್ಟೆಂಬರ್ 17 ರಂದು ಮಾರ್ಗಸೂಚಿ ಸಲಹೆಯನ್ನು ಸಲ್ಲಿಸಲು ಸೂಚಿಸಿದ್ದು, ಎಪಿಸಿಆರ್ ಅದನ್ನು ಸಿದ್ಧಪಡಿಸಿ ಸುಪ್ರೀಂ ಕೋರ್ಟ್ನಲ್ಲಿ ಪ್ರಸ್ತುತಪಡಿಸಲಿದೆ.
2022 ರಲ್ಲಿ APCR ಬುಲ್ಡೋಜಿಂಗ್ ನ್ಯಾಯದ ವಿರುದ್ಧ ಇಬ್ಬರು ಸಂತ್ರಸ್ಥರೊಂದಿಗೆ ದೇಶದ ಸರ್ವೋಚ್ಚ ನ್ಯಾಯಾಲಯದ ಬಾಗಿಲಿಗೆ ತಟ್ಟಿದಾಗ ಪ್ರಕರಣವು ಮತ್ತಷ್ಟು ಬಲವನ್ನು ಪಡೆಯಿತು. ಬುಲ್ಡೋಜರ್ ವಿಚಾರಣೆಯ ಪ್ರಕರಣದಲ್ಲಿ ಇದೇ ಮೊದಲ ಬಾರಿಗೆ ನೊಂದ ಕಕ್ಷಿದಾರರು ನೇರವಾಗಿ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಿದ್ದಾರೆ.
ಸೆಪ್ಟೆಂಬರ್ 17 ರಂದು, ಈ ವಿಷಯದಲ್ಲಿ ಸುಪ್ರೀಂ ಕೋರ್ಟ್ನಿಂದ ಕೆಲವು ಸಕಾರಾತ್ಮಕ ಸುದ್ದಿ ಬರಬಹುದು ಎಂದು ನಿರೀಕ್ಷಿಸಲಾಗಿದೆ.
ಈ ಪ್ರಕರಣವು ಪೀಡಿತ ಜನರ ಹಕ್ಕುಗಳನ್ನು ರಕ್ಷಿಸಲು ಮಾತ್ರವಲ್ಲ, ದೇಶಾದ್ಯಂತ ಕಾನೂನು ಪ್ರಕ್ರಿಯೆಗೆ ಕಟ್ಟುನಿಟ್ಟಾದ ಅನುಸರಣೆಯನ್ನು ಖಾತ್ರಿಪಡಿಸುವ ಪ್ರಮುಖ ಹೆಜ್ಜೆಯಾಗಿದೆ. ಸುಪ್ರೀಂ ಕೋರ್ಟ್ನ ಈ ಉಪಕ್ರಮವು ಅನ್ಯಾಯದ ಬುಲ್ಡೋಜಿಂಗ್ ಅನ್ನು ನಿಲ್ಲಿಸುತ್ತದೆ ಮತ್ತು ಅನಿಯಂತ್ರಿತ ಪ್ರತೀಕಾರದ ಕ್ರಮಗಳ ವಿರುದ್ಧ ಲಗಾಮು ಬೀಳಲಿದೆ ಎಂದು ನಿರೀಕ್ಷಿಸಲಾಗಿದೆ.