ಭಟ್ಕಳ: ಭಟ್ಕಳ ತಾಲೂಕಿನ ಕೋಣಾರ ಗ್ರಾ.ಪಂ. ವ್ಯಾಪ್ತಿಯ ಬೀಳೂರು ಗ್ರಾಮದಲ್ಲಿ ಭಾರಿ ಗಾತ್ರದ ಬಂಡೆ ಕಲ್ಲೊಂದು ಕುಸಿದಿದ್ದು ಅದೃಷ್ಟವಶಾತ್ ಭಾರಿ ಅನಾಹುತವೊಂದು ತಪ್ಪಿದಂತಾಗಿದೆ.

ಅಂದಾಜು ೫೦೦ ಅಡಿ ಎತ್ತರಿಂದ ಜಾರಿ ಬಂದ ಈ ಬಂಡೆಕಲ್ಲು ಮಾರುಕೇರಿ ಕುಂಟವಾಣಿ ರಸ್ತೆಗೆ ತಾಗಿಕೊಂಡಿರುವ ದಿಣ್ಣೆಯೊಂದರ ಮೇಲೆ ನಿಂತುಕೊಂಡಿದೆ. ಒಂದು ವೇಳೆ ಇದು ಅಲ್ಲಿಂದಲೂ ಜಾರಿದ್ದರೆ ಪರಿಸ್ಥಿತಿ ತೀರ ಗಂಭಿರ ಸ್ವರೂಪ ಪಡೆದುಕೊಳ್ಳುತ್ತಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ಮಾಹಿತಿ ನೀಡಿದ್ದಾರೆ.

ಕಳೆದ ವರ್ಷ ಆಗಷ್ಟ್ ತಿಂಗಳಲ್ಲಿ ಮುಟ್ಟಳ್ಳಿ ಗ್ರಾ.ಪಂ.ವ್ಯಾಪ್ತಿಯಲ್ಲಿ ಗುಡ್ಡ ಕುಸಿದು ಮನೆಯೊಂದರ ಮೇಲೆ ಬಿದ್ದ ಪರಿಣಾಮ ನಾಲ್ವರು ಜೀವಂತ ಸಮಾಧಿಯಾಗಿರುವ ಘಟನೆ ತಾಲೂಕಿನ ಜನರ ಮನಸ್ಸಿನಿಂದ ಮರೆಯಾಗಿಲ್ಲ. ವರ್ಷ ಕಳೆಯುವುದಕ್ಕಿಂತ ಮುಂಚೆ ಮತ್ತೊಂದು ಅನಾಹುತಕ್ಕೆ ಭಟ್ಕಳ ತಾಲೂಕು ಸಾಕ್ಷಿಯಾಗುವ ಮುನ್ನ ಗುಡ್ಡಕುಸಿತಕ್ಕೆ ಸಂಬಂಧ ತಾಲೂಕಾಡಳಿತ ಸೂಕ್ತ ಕ್ರಮಗಳನ್ನು ಕೈಕೊಳ್ಳಬೇಕು ಎಂಬ ಕೂಗು ಕೇಳತೊಡಗಿದೆ.

ಬುಧವಾರದಂದು ಭಾರೀ ಪ್ರಮಾಣದ ಕಲ್ಲುಬಂಡೆ ಕುಸಿದು ಬಿದ್ದು ಸದ್ಯ ಗಂಭೀರ ಪರಿಸ್ಥಿತಿ ಎದುರಿಸುತ್ತಿದೆ. ದೊಡ್ಡ ಬಂಡೆಯೊಂದು ಜಾರಿ ಕೆಳಗೆ ಬಿದ್ದಿದ್ದು, ಗ್ರಾಮಸ್ಥರ ಸುರಕ್ಷತೆಗೆ ಆತಂಕ ಸೃಷ್ಟಿಸಿದೆ.

ತಾಲ್ಲೂಕಿನಲ್ಲಿ ಕಳೆದ ಎರಡು ದಿನಗಳಿಂದ ನಿರಂತರ ಮಳೆಯಾಗುತ್ತಿದ್ದು, ಸಂಭಾವ್ಯ ಅಪಾಯಗಳನ್ನು ಇನ್ನಷ್ಟು ಹೆಚ್ಚಿಸಿದೆ. ಪರಿಸ್ಥಿತಿಯನ್ನು ಅವಲೋಕಿಸುತ್ತಿರುವ ಕೋಣಾರ  ಗ್ರಾಮದ ಗ್ರಾಮ ಪಂಚಾಯಿತಿ ತೀವ್ರ ಕಟ್ಟೆಚ್ಚರ ವಹಿಸಿದೆ.

ಬೆಟ್ಟದ ಕೆಳಭಾಗದಲ್ಲಿರುವ ವಸತಿ ಪ್ರದೇಶದಲ್ಲಿ ಬಂಡೆಯು ಜಾರಿಕೊಂಡು ರಸ್ತೆಯನ್ನು ತಲುಪಿದರೆ ಪ್ರಾಣಹಾನಿ ಸಂಭವಿಸಬಹುದೆಂಬ ಆತಂಕ ಸ್ಥಳಿಯರಲ್ಲಿ ಮೂಡಿಸಿದೆ. ತುರ್ತಾಗಿ ಬಂಡೆಯನ್ನು ತೆರವುಗೊಳಿಸಲು ಮತ್ತು ಸಂಭಾವ್ಯ ಅಪಾಯ ತಗ್ಗಿಸಲು ಅಧಿಕಾರಿಗಳು ತಕ್ಷಣ ಕ್ರಮ ಕೈಗೊಳ್ಳಬೇಕು ಎಂದು ಗ್ರಾಮಸ್ಥರು ಒತ್ತಾಯಿಸಿದ್ದಾರೆ. ನೋಡಲ್ ಅಧಿಕಾರಿ ಮಲ್ಲಪ್ಪ, ಗ್ರಾಮ ಲೆಕ್ಕಾಧಿಕಾರಿ ಶಂಭು ಹಾಗೂ ಕೋಣಾರ ಗ್ರಾಮ ಪಂಚಾಯಿತಿ ಅಭಿವೃದ್ಧಿ ಅಧಿಕಾರಿ (ಪಿಡಿಒ) ಸ್ಥಳಕ್ಕೆ ಭೇಟಿ ನೀಡಿ ಪರಿಸ್ಥಿತಿ ಅವಲೋಕಿಸುತ್ತಿದ್ದಾರೆ.

ಕರಾವಳಿ, ಪಶ್ಚಿಮ ಘಟ್ಟಗಳು ಮತ್ತು ಅರೆ-ಮಲೆನಾಡಿನ ಪ್ರದೇಶಗಳು ಮಣ್ಣಿನ ಸವೆತ ಅಥವಾ ತೊರೆಗಳಲ್ಲಿನ ಸೆಳೆತದಿಂದ ಉಂಟಾಗುವ ಭೂಕುಸಿತಕ್ಕೆ ಆಗಾಗ ಗುರಿಯಾಗುತ್ತಲೆ ಇರುತ್ತವೆ. ಈಗಾಗಲೇ ಭಾರಿ ಕುಸಿತ ಕಂಡಿರುವ ಕೋಣಾರ ಪ್ರದೇಶ ಮುಂದಿನ ದಿನಗಳಲ್ಲಿ ಮತ್ತಷ್ಟು ಕುಸಿತ ಸಂಭವಿಸುವ ಸಾಧ್ಯತೆಗಳಿವೆ ಎಂದು ಹೇಳಲಾಗುತ್ತಿದೆ.  .ನಿರಂತರ ಮಳೆ ಮುಂದುವರಿದರೆ, ಬೆಟ್ಟದ ತಳದಲ್ಲಿ ಮಣ್ಣು ಕುಸಿಯುವ ಸಾಧ್ಯತೆ ಹೆಚ್ಚಿದ್ದು, ಬಂಡೆಗಳ ಕುಸಿತ ಮತ್ತು ಸಂಭಾವ್ಯ ವಿನಾಶಕ್ಕೆ ಕಾರಣವಾಗುತ್ತದೆ ಎಂದು ತಜ್ಞರು ಎಚ್ಚರಿಸಿದ್ದಾರೆ.

Harrowing Rockslide Incident in Bhatkal Raises Concerns about Hillside Safety