ریاست کرناٹک کے 69ویں راجیہ اتسو ایوارڈز تقریب میں 69 شخصیات کو اعزازات، کنڑا زبان کے فروغ پر وزیراعلیٰ نے دیا زور
بینگلورو، 2 نومبر (ایس او نیوز): ریاست کرناٹک کے 69ویں راجیہ اتسوا کے موقع پر جمعہ، یکم نومبر کو وزیر اعلیٰ سدارامیا نے 69 ممتاز شخصیات کو اعزازات سے نوازا۔ ان شخصیات میں مختلف شعبوں میں نمایاں کارنامے انجام دینے اور کرناٹک کی خدمت میں مثالی کردار ادا کرنے والے افراد شامل ہیں، جن میں سابق وزیر اعلیٰ اور مصنف ڈاکٹر ویرپّا موئیلی، متحدہ عرب امارات میں مقیم تھمبے گروپ کے بانی اور صدر ڈاکٹر تھمبے محی الدین، صحافی اور کالم نگار سنتھ کمار بیلاگلی، اور ہائی کورٹ کے معروف وکیل ایس بالن شامل ہیں۔ تمام شخصیات کو ایوارڈ کے ساتھ پانچ لاکھ روپیہ نقد اور 25 گرام سونا بطور انعام پیش کر کے ان کی خدمات کو سراہا گیا۔
اس موقع پر خطاب کرتے ہوئے وزیر اعلیٰ سدارامیا نے اعلان کیا کہ اب سے ریاست میں تیار ہونے والی تمام اشیاء پر کنڑا اور انگریزی دونوں زبانوں میں لیبل لگانا لازمی ہوگا۔ انہوں نے نجی اور سرکاری شعبے کے پیداواری اداروں پر زور دیا کہ وہ اس پر عمل کرتے ہوئے کنڑا زبان کو فروغ دیں۔
وزیر اعلیٰ نے کنڑا زبان کی اہمیت پر زور دیتے ہوئے کہا، "آج کے تاریخی دن، ہم عہد کرتے ہیں کہ ریاست میں آنے والے ہر فرد کو ہماری زبان سیکھنے اور کنڑا میں بات چیت کرنے کا موقع فراہم کریں گے۔" یہ اعلان میسور ریاست کا نام بدل کر کرناٹک رکھنے کی 50ویں سالگرہ کے موقع پر کیا گیا، جسے ریاست کی تاریخ میں ایک سنگ میل قرار دیا جا رہا ہے۔
وزیر اعلیٰ نے اعلان کیا کہ میسورو میں ڈپٹی کمشنر کا دفتر، جسے اتارا کچیری کے نام سے جانا جاتا ہے، کو "کنڑا میوزیم" میں تبدیل کیا جائے گا تاکہ اس سال کی تاریخی اہمیت کو اجاگر کیا جا سکے۔
مزید برآں، وزیر اعلیٰ سدارامیا نے ریاست کی اہم اقتصادی حیثیت کو اجاگر کرتے ہوئے مرکز سے ٹیکس کی منصفانہ تقسیم کی اپیل کی۔ کرناٹک، جو ٹیکس کی مد میں ملک میں دوسری سب سے زیادہ ادائیگی کرنے والی ریاست ہے، سالانہ 4 لاکھ کروڑ سے زائد ٹیکس ادا کرتی ہے، لیکن مرکز سے صرف 55,000-60,000 کروڑ روپے ہی وصول کرتی ہے۔ انہوں نے اس بات پر زور دیا کہ کرناٹک کو وسائل سے مکمل طور پر محروم نہیں کیا جانا چاہیے۔
راجیہ اتسوا ایوارڈز کے 69 اور سوورنا مہوتسو ایوارڈز کے 100 وصول کنندگان کو مبارکباد پیش کرتے ہوئے وزیر اعلیٰ نے ان کی خدمات کی تعریف کی۔ ڈی کے شیوکمار نے بھی تمام اعزاز حاصل کرنے والوں کو مبارکباد دیتے ہوئے ان کی ماضی کی محنت کا اعتراف کیا۔
