بھٹکل 8 جولائی (ایس او نیوز) بھٹکل کے ایک مکان پر چھاپہ مارکر پولس نے ایک خاتون کو گرفتار کرنے کے ساتھ ساتھ ایک دوسری خاتون کو اُسی کے گھر سے بازیافت بھی کرایا ہے۔ واردات جمعہ کی شب کو بھٹکل کے مضافاتی علاقہ کُنٹوانی میں  پیش آئی ہے۔

پولس نے جسم فروشی کے الزام میں جس خاتون کو گرفتار کیا ہے، اُس کی شناخت رادھا سُبرایا شٹی (45) کی حیثیت سے کی  گئی ہے

پولس ذرائع کے مطابق ملزمہ رادھا شیٹی اپنے گھر میں بنگلور سے تعلق رکھنے والی  ایک   28 سالہ خاتون کو جسم فروشی کے لئے استعمال کررہی تھی اور گاہکوں سے پیسے وصول کرتی تھی۔ بتایا گیا ہے کہ وہ موبائل فون  کے ذریعے گاہکوں کو اپنے گھر بُلا کر جسم فروشی کا کام کرتی تھی۔

بتایا جاتا ہے کہ اس سلسلے میں عوام نے   پولس کو کئی بار شکایت کی تھی، مگرہر بار وہ قانون کی نظروں سے بچ رہی  تھی البتہ  جمعہ کو   بھٹکل ڈی وائی ایس پی شری کانت کی قیادت میں پولس  کی ایک ٹیم  نے مصدقہ اطلاع پر  ملزمہ کے مکان پر چھاپہ مارا اور ایک خاتون کو بازیافت کراتے ہوئے  ملزمہ رادھا  کو  گرفتار کر لیا۔ پولس نے ملزمہ کے پاس سے تین موبائل اور کچھ رقم بھی  برآمد کی ہے۔

مضافاتی  پولس تھانہ میں معاملہ درج کرلیا گیا ہے اورپولس مزید چھان بین کررہی ہے۔