بھٹکل میں نوجوان نے پھانسی لگا کر کی خودکشی
بھٹکل 25 مارچ (ایس او نیوز) 24 سالہ نوجوان کی نعش اُس کے ہی مکان کی چھت پر لٹکتے ہوئے پائی گئی، جس کے تعلق سے بتایا گیا ہے کہ کسی بات سے پریشان ہوکر اس نے خودکشی کرلی ہے۔ واردات بھٹکل ٹاون کے ہنومان نگر میں سنیچر صبح قریب دس بجے پیش آئی۔
مہلوک نوجوان کی شناخت ایشور منجوناتھ نائک کی حیثیت سے کی گئی ہے۔ وہ ہنومان نگر میں واقع ایک بیکری میں ملازمت کرتا تھا۔ پتہ چلا ہے کہ صبح دس بجے سے پہلے اس نے بیکری کے دوسرے ملازم سے فون پر بات چیت کی تھی اور بتایا تھا کہ وہ کچھ دیر بعد بیکری آرہا ہے، مگر صبح دس بجے واپس فون کیا گیا تو جواب نہیں ملا۔ جس کے بعد پتہ چلا کہ اس نے اپنے ہی گھر میں پھانسی لگاکر خودکشی کرلی ہے۔ خودکشی کی وجہ معلوم نہیں ہوسکی ہے۔
مہلوک ایشور کو دو بہنیں ہیں، جس میں سے بڑی بہن کی شادی ہوچکی ہے، وہ اپنے والدین اور چھوٹی بہن کے ساتھ گھر میں رہتا تھا، بتایا گیا ہے کہ واردات کے دوران گھر پر کوئی موجود نہیں تھا۔
بھٹکل ٹاون پولس تھانہ میں معاملہ درج کیا گیا ہے۔
Report in English:
Youth hangs self to death in Bhatkal
