بھٹکل 16/اکتوبر (ایس او نیوز) بھٹکل جالی پٹن  پنچایت کونسلر مصباح الحق نے الزام لگایا ہے کہ یو جی ڈی کنٹریکٹنگ  کمپنی کے تین اہلکاروں نے اس پر گاڑی چڑھا نے کی کوشش کی اور اسے  جان سے مارنے کی کوشش کی ، مگر مقامی لوگوں  کے فوری جائے وقوع پر پہنچنے کی وجہ سے  وہ اس میں کامیاب نہیں ہوسکے۔ اس تعلق سے مصباح الحق نے دیگر پنچایت اراکین اور مقامی لوگوں کو ساتھ لے کر بھٹکل مضافاتی پولس تھانہ میں کنٹریکٹنگ کمپنی کے سُپروائزر، سائٹ انجینئر اور Excavator  کے آپریٹر کے خلاف شکایت  درج کی ہے اور تینوں کو گرفتار کرتے ہوئے  قانونی کاروائی کرنے کی مانگ کی ہے۔

مصباح الحق نے بتایا کہ یو جی ڈی  کے کام کے لئے کھدائی  کرنے والی مشین ( Excavator) کو راستوں پر سے لے جانے کے دوران یو جی ڈی کنٹریکٹنگ کمپنی کے اہلکارمعیاری آپریٹنگ طریقہ کار(standard operating procedure) کو مسلسل نظر انداز کررہے ہیں، جس کی وجہ سے  سڑکیں خراب ہورہی ہیں۔ پروسیجر کے مطابق  کھدائی کرنے والی مشین کو جب کہیں لے جانا ہوتوضروری ہے کہ سڑٖک پر میٹ بچھا کر یا  پرانے ٹائروں  کا استعمال کرتے ہوئے لے جایا جائے، اس سے پہلے تین مرتبہ وارننگ دینے کے بعد چوتھی مرتبہ پنچایت کی طرف سے یوجی ڈی والوں پر جرمانہ عائد کیا گیا تھا اور آئندہ پروسیجر کو فالو کئے بغیر مشین کوسڑک پر نہ چلانے کی گیارنٹی لی گئی تھی، مگر ان سب کے باوجود 13 اکتوبر کو پھر ان لوگوں نے رات قریب گیارہ بجے  Excavator کو کانکریٹ روڈ پر سے گذار کر ہورلی سال  لے آئے۔ مصباح کا کہنا ہے کہ جب اُسے مشین چلنے کی آواز سنائی دی تو وہ ا پنے گھر سے باہر آیا اور مشین کو آگے بڑھنے سے روک دیا۔ اس دوران سُپروائزر اور سائٹ انجینئر وہاں پہنچ گئے۔

جب مصباح نے  مشین  لے  جانے کے تعلق سے اعتراض جتایا تو سُپروائزر اس بات پر گرم ہوگیا کہ یہاں کسی کو مشین لے جانے پر کوئی اعتراض نہیں ہے صرف تم ہی ہمارے کام میں بار بار رکاوٹ پیدا کررہے ہو، مصباح کے مطابق  سپروائزر نے  پھر مشین آپریٹر کو حکم دیا کہ وہ مشین کو اسی پر چڑھادے، آج اس کا کام یہیں پر تمام کریں گے۔ جس کے بعد آپریٹر نے تیزی کے ساتھ مشین اس پر چڑھانے کی کوشش کی، مگر مصباح وہاں سے پیچھے ہٹ گیا، آپریٹر نے مزید کوشش کی، مگر اس دوران گھر سے اس کی ماں پھر پڑوس سے بھی لوگ باہر آنا شروع ہوگئے۔ لوگوں کو  باہر آتا دیکھ کر اس نے مشین کو روک دیا۔ مصباح الحق نے  بتایا کہ اس نے فوراً 112 ڈائل کرکے پولس کو  مدد کے لئے بلایا۔  اور پولس کو فون کرتے دیکھ کر یہ لوگ وہاں سے فرار ہوگئے۔ بقول مصباح  فون کرتے ہی پولس جائے وقوع پر پہنچ گئی اورضروری معلومات حاصل کرنے کے بعد جائے وقوع کا جائزہ لیا۔ پھر اگلی صبح مصباح نے دیگرکونسلروں بالخصوص محمد توفیق بیری،  سید مُنیر، عرفان اور دیگر مقامی لوگوں کو ساتھ  لے کر بھٹکل مضافاتی پولس تھانہ پہنچ گئے اور یو جی ڈی کنٹریکٹنگ کمپنی کے تین اہلکاروں کے خلاف معاملہ درج کیا۔

اخبارنویسوں سے گفتگو کرتے ہوئے محمد توفیق بیری نے بتایا کہ  یو جی ڈی والے ایک طرف  پروسیجر کو فالوکئے بغیر کام کررہے ہیں اور جب کونسلر اپنی  ذمہ داری نبھاتے ہوئے اعتراض جتاتے ہیں تو یہ لوگ ہم کو ہی جان سے مارنے کی کوشش کرتے ہیں تو یہ  بالکل قابل قبول نہیں ہے، ہم اس کی سخت مذمت کرتے ہیں۔ توفیق نے بتایا کہ انہوں نے اس تعلق سے چیف آفسر سے  بھی درخواست کی ہے کہ وہ بھی اپنی طرف سے  متعلقہ یو جی ڈی اہلکاروں کے خلاف پولس تھانہ میں معاملہ درج کرے۔ توفیق نے بتایا کہ کونسلروں کے ساتھ اس طرح کی غنڈہ گردیوں کو ہرگزبرداشت نہیں کیا جائے گا۔

پولس انسپکٹرگوپال چندن نے بتایا کہ  معاملے کو لے کر ایف آئی آر درج کی گئی ہے۔ یو جی ڈی والوں سے کہا گیا ہے کہ وہ متعلقہ مشین کو تھانہ لے کر آئے۔ چھان بین جاری ہے اور پولس  قانون کے مطابق مناسب کاروائی کرے گی۔